Desaroyo den enseñansa ta preocupante

Tin diferente desaroyo toch cu ta sumamente preocupante pa loke ta e tema di Enseñansa cu parlamentario Jennifer Arends-Reyes a toca. Un di nan ta e decision unilateral pa privatisa e unico scolnan publico di Aruba y esaki sigur tanto e fraccion como locual cu por tende tambe den e grupo di docentenan aki, ta inaceptabel.

Por wak tambe cu e desicion aki, pasobra manera cu e ta wordo treci dilanti, ta parce net cu ta un decision cla caba. Ya nan a tuma e decision aki, no por bay bek atras.

E manera cu a trece dilanti tambe, no a cay den bon tera, ni pa e docentenan cu ta trahando den e scolnan publico, pero tambe e trahadonan. Tin cu corda cu na momento cu ta papia di Dienst Publieke Scholen, no ta solamente ta docente, pero tambe trahado.

Aki ta haya cu e manera cu ta trece dilanti ta full fout, segun e parlamentario.

Tambe, tin e pregunta dicon ta tuma decisionnan asina drastico na e momentonan aki pa loke ta docente y trahadonan. No mester lubida un parti escencial di parti di DPS, cu ta e alumnonan cu na e momentonan aki, no ta depende di e maneho estricto tin biaha di fundacionnan.

Tambe e parlamentario a agrega, cu na e momentonan aki, e ta solidario tanto pa docente, e trahado y alumnonan, cu awe mester bisa cu ta den incertidumbre pasobra nan no sa di awe pa mañan, kico lo bay pasa cu nan huridicamente y tambe nan tin demasiado pregunta tocante esaki.

Un di e puntonan tambe ta sigur cu e ta un decision cu netamente, politica ta tuma unilateralmente. Esey kiermen cu no a puntra opinion di ningun hende. E caso aki y e decision aki, no solamente ta importante pa por scucha so, pero pa haci algo concreto, mustra seriedad y pone e decision aki on hold. Esaki lo ta e miho paso cu lo por tuma pa asina ey por tin un bon evaluacion di tur e consecuencianan, no solamente pa e grupo aki, pero tambe pa Aruba y enseñansa den su totalidad.

Mester evalua e consecuencianan tambe bon, pa esnan cu awe ta den e posicion huridico di docente, cu ta den un stichting caba. Bo no mester por bisa kico ta e ripple effect cu e lo tin di e decision aki. Cu esey e parlamentario kiermen, cu na momento cu bo no tin scol publico mas na Aruba, e ora ta riba cual ambtenaar cu gelijke functie lo bo ta bezig e ora ta benchmark e docentenan.

Por ta por bisa cu e por ta logico, locual cu por imagina cu e contesta ta, pero na e momentonan aki no por laga ningun loose ends, no por laga nada habri pa interpretacion. Na momento cu ta trece un decision grandi asina ey, lo mester laga espacio pa interpretacion y vooral no, pa directiva di fundacionnan. Na e momento eynan, caminda cu ta proteha e docentenan cu ley, mester ta asina cu ora bo ta introduci algo, e mester ta tambe waterdicht. No mester tin ningun espacio pa ningun momento cu bo por interpreta cosnan diferente. Sino, mañan ta caso tras di caso lo haya na hues, pasobra cu e docentenan of trahadonan of esnan cu lo por wordo perhudica na momento cu tin un discrepancia, of cu tin un conflicto y bo ta haya cu directivanan di fundacion lo kier tuma decisionnan riba ley.

Pa preveni tur esakinan, ta bon pa refleha un grupo di hoogopgeleidenan aki asina lihe. Of mester ta asina cu tin mas rason tras di esaki. Talbes weganan politico, por ta cu ariba papel bo ta mustra den un solo biaha cu bo ta kita e ora ey e status di ambtenaar di mil persona den un biaha. E ora pa bo tene Hulanda contento.

E parlamentario ta indica cu esaki tambe, e gobierno nobo mester percura pa nos hendenan cu ta biba riba e pais y Aruba prome. Manera nan mes tabata bisa, pa tene e hendenan di Aruba di berdad central. Esaki ta accionnan y mil hende den un solo biaha cu ta ponebo pensa cu si di berdad e ora nos hendenan ta central. Of tin algo tras di esaki.

E decision aki sigur ta afecta den bida di mas of menos 1000 persona. Mil ambtenaar. Mil cas na Aruba cu lo tin e ora no lo tin mas e libertad pa dicidi riba nan futuro, planning di nan carera profesional y posicion huridico. Esaki, si di berdad ta bisa cu ta keda igual na tur cos, e ora ey na unda lo reduci e gasto anto.

Reduciendo salario di trahadonan, no sa esey.

A tribi di bisa cu ta un all time high, cu nunca antes e tabata asina halto. Awo tin un gobierno nobo cu a campaña di inverti ainda mas den enseñansa. Pero awo pueblo por wak riba su mes kico ta hayando bek. Reduccion, persecusion, menos posibilidad y vooral na momento cu fundacionnan ta cera porta pa alumno, pa motibo di nan maneho. Esaki por a wak den pasado y locual ta e consecuencia di nan. Awo, si nos haya cu no tin scol publico mas, e ora ta unda nos alumnonan tin cu bay. Esey ta keda netamente den man di e directiva di e fundacionnan. Na e momento eynan, kico ta e decision cu nan lo tuma.

Fuera cu e argumento di tuma e paso aki, pa e motibo cu tin cu corta gasto, ta menciona cu kier tene politica leu di enseñansa. Ciendo cu otro coleganan minister di e coalicion MEP, POR y RED, ta bay te hues, pa nombra nan hendenan den e diferente directivanan di fundacion. E argumento aki tambe no ta uno cu ta convincente. Si e argumentonan aki no ta suficiente pa pone e idea aki on hold, ainda tin e argumento cu ta un decision cu no a ser tuma den consulta cu e veld, ni cu e representantenan, ni cu sindicato. Awo den consulta, cu a tende y a haci algo tambe, concreto cu nan preocupacion. Esaki, ta algo cu na aña 2018, sigur ta algo inaceptabel. E parlamentario ta kere cu decisionnan grandi asina no por bay sin mas.

Di parti di fraccion di AVP, ta asina cu a manda pregunta pa e minister di enseñansa y lo ta sperando riba e contestanan.

Nos maestro y trahadonan sigur ta e weso di lomba di nos enseñansa. A priminti nan cu nada lo cambia. Ta un promesa. Awo lo ta tristo pa despues nan bay ripara cu e realidad y con e ta traha di berdad, lo ta diferente. Esey si awor aki, ningun persona lo sali y bisa cu di berdad ban evalua e cos aki bon, mañan lo ta laat. E ora lo ta mosterd na de maaltijd. Pesey ta importante pa e voz, e deseo y e derecho di nos docentenan, trahadonan y no lubida, e alumnonan tambe, keda presente den tur momento y e decision tambe.

Parlamentario Jennifer Arends-Reyes, ta haci un apelacion pa wak si por pone e decision aki on hold, tanten cu no bin mas claridad, tanten cu no bin mas dialogo riba esaki y tambe, primordialmente, riba papel pa wak si di berdad e derechonan tambe huridico di e personanan aki, cu na e momentonan aki lo cambia status, lo wordo salvaguardia.