E play-off di campeonato 2018/2019 di Division Honor ta yegando su final y pronto lo haya sa cua ta e 2 team cu lo enfrenta otro den final. E teamnan di RCA y Deportivo Nacional ta tabla cu 10 punto respectivo, mientras cu Dakota ta sigui cu 8 punto y Estrella tin menos punto. Deportivo Nacional y RCA a gana nan wega y ta na prome luga en espera pa nan siguiente wega.
Deportivo Nacional a topa SV Estrella den e di dos wega di e di dos rond y a bay cu e victoria di 4-1. Dreyer Bracho, coach di Deportivo Nacional, a indica cu e team a sali manera mester ta cu hopi intensidad den atake pa por a anota trempan. Esey tabata nan obhetivo principal y tur cos a bay bon.
A anota 4 gol bou 30 minuut di wega y Deportivo Nacional ta kere cu nan por a anota hopi mas. “Estrella ta un team cu a haci cambionan tactico y tin hopi arma. Por pensa cu nan no por cualifica pero nan a bin cu hopi curason y a demostra cu nan t’ey. Un pabien na nan”, segun Dreyer Bracho.
RCA a topa cu Dakota y a bay cu e victoria di 3-2. Omar Tromp, director tecnico di RCA, a indica cu e wega tabata manera un final y nan a tuma esaki na serio. Nan a prepara bon p’e wega y a logra esaki, p’esey e director tecnico ta orguyoso di e hungadonan. Ainda no por bisa cua teamnan lo hunga e final mirando cu Dakota, RCA y Deportivo Nacional tin chens pa yega esaki, el a indica.
Deportivo Nacional ta invita su fanaticonan pa yega stadion Compleho Deportivo Guillermo Trinidad diadomingo dia 9 di Juni pa apoya nan, unda nan lo ta enfrentando Dakota. RCA lo ta enfrentando SV Estrella y ta invita fanaticonan, amantenan di bon futbol pa yega stadion Compleho Deportivo Frans Figaroa y apoya nan.
