Departamentonan di Wit Gele Kruis tey pa asisti e mayornan dese nacemento di nan yiu

Departamento di GVO (Gezondheid Voorlichting en Opvoeding) ta un departamento cu ta basta nobo den Wit Gele Kruis. E aña aki nan ta cumpli 7 aña cu e ta existi. Segun coordinadora Marila Solognier, tin algun departamento di cuido nobo cu tambe ta existi desde 2012. Un di nan ta e Departamento di Stevig Ouderschap (Mayor Firme), unda cu ta bay cerca e mayornan cu a caba di haya un baby.

Ta duna nan e sosten pa, vooral den criansa y cuido di nan yiu of yiunan. Si tin algo por mira of ripara cerca e otro yiu, tambe ta duna e mayornan conseho tocante esaki.

Tambe tin departamento di Mamanan hoben cu tambe ta duna guia y tin tambe e departamento di Kraamzorg, cu ta duna cuido ora e babynan sali for di hospital, cu ta duna e guia na e mayornan na cas, pa e cuido di nan baby recien naci.

Tambe tin e departamento di dietista cu tambe ta duna guia na e adultonan y tambe na e mayornan ora cu nan bin consulta cu nan yiu di 1 aña y mey durante consulta di cuido dental y nutricion y ta duna mayornan guia y  conseho tocante e nutricion di nan yiu.

Conseho cerca e mayornan

Segun Solognier, desde cu e baby nace ta duna e guia aki. E ta cuminsa for di e Departamento di Kraamzorg. Esaki naturalmente despues di 1 siman ta bay e consultanan di baby, caminda cu e mayornan ta haya guia y conseho di e enfermera y dokternan, te cu edad di 1 aña y mey.

E consultanan ta sigui te cu 4 aña, pasobra e cuido cu WGK ta duna e muchanan ta di 0 te cu 4 pa 5 aña. Nan tin nan consultanan cu nan ta haya invitacion via post y asina nan por bin cu nan yiu na WGK, unda ta sigui tira un bista riba e desaroyo y e crecemento di e mucha.

Comportacion

Tin biaha mayornan sa faya. Asina mes ta papia cu e mayornan. Ta verwijsnan cerca otro instancia, si en caso cu nan sigui faya. Ta verwijsnan pa Fundacion pa Nos Muchanan, tambe na Telefon 161, cu ta duna e mayornan hopi conseho y tips con nan por cuida y educa nan yiunan. E mayornan por bira miembro di WGK di ora cu e muchanan nace, te ora cu nan mes bira grandi y tin mester di ayudo.  Nan por paga nan miembrecia anual y asina nan por keda miembro te cu 100 aña mes, segun Solognier.

Comments

comments