For di Juni pa December ta e temporada di horcan. Na Aruba no solamente mester prepara riba un posibel horcan, pero tambe mester ta prepara pa posibel epidemia of brotenan di malesanan transmiti door di sangura cual ta Zika, Dengue y Chikungunya.
Segun Jurette Croes di Departamento di Salubridad Publico (DVG), normalmente sa cu den e temporada aki tin hopi yobida na Aruba y esakinan hopi biaha, si no ta cauteloso, si no preveni door di kita tur e criaderonan cu por existi door di awasero, por haya un biaha mas un brote di malesanan transmiti door di sangura.
Departamento di Salud Publico ta prepara pa temporada di sangura
https://24ora.tv/2WkZbTzPosted by 24ora on Saturday, June 8, 2019
Pa e motibo aki tambe, tur aña DVG ta trece conscientisacion na comunidad. Nan ta acerca comunidad pa traha hunto cu DVG pa asina evita esaki door di cana rond di cas, kita tur artefacto cu ta para y cu no tin uzo pa nan y cu por bira un criadero, y pa deshaci di nan.
E aña aki un biaha mas tin un campaña y e campaña aki ta bisa “Ta nan temporada atrobe. Proteha bo mes y bo famia di malesanan transmiti door di sangura”. Cu e campaña aki ta brinda comunidad varios tips. Kier pa tira afo por ehempel tur awa para paden y pafo di nan cas.
Haci un inspeccion den bo cas. Check si bo tin mata, vaas cu flor of cu mata, cu tin awa, esakinan por bira criadero. Check patras di bo frigidaire. Hopi biaha tin un baki cu por retene awa. Haci un inspeccion den bo cas. Uza screen na porta y bentana di bo cas. Uza repelente contra sangura parti atardi y anochi. Bisti preferibel pañanan color cla cu manga largo y pia largo parti atardi of anochi.
Esaki pasobra e sangura nos sa cu hopi biaha parti atardi y anochi nan ta mas efectivo. Tapa tur awa cu ta wordo acumula pa uzo domestico. Cuida esakinan bon. Hopi persona ta acumula awa pa por cria nan bestianan of muha mata, of pa laba paña. Ta pidi comunidad cu si bo ta un persona cu ta acumula awa, por pasa GKMB pa busca pisca pa come e larvanan. Por tira kimico pa mata e larvanan of pone un screen riba e awanan aki.
Ta hopi necesario cu e awanan aki wordo proteha. Tambe si bo tin keintura durante e periodo aki, proteha bo mes pa pica di sangura.
Pakico ta bisa esaki
Keintura ta un di e sintomanan cu ta presenta den tur tres malesa, esta Zika, Dengue y Chikungunya. E persona ta haya keintura y evita cu mas hende keda contagia cu e malesanan transmiti door di sangura. Na momento cu bo tin keintura, proteha bo mes lo maximo posibel pa no wordo pica door di sangura.
Campaña
E campaña di e aña aki, ta uno masivo. Ta bay scucha mensahenan na radio, como tambe riba social media, na television. Tur cas na Aruba ta haya un flyer cu tin e informacion riba dje na unda cu ta pidi na comunidad pa por fabor tuma bon nota di e flyer, lesa e tipsnan y practica esaki tambe.
