Tur loke cu tin di haber cu calamidad y menasa di derame petrolero, ta yega mesora na Directie Natuur en Milieu (DNM). P’esey nan ta den e comision cu tin di haber cu asuntonan di calamidad.
Gisbert Boekoudt, director di DNM, nan ta basta siman na altura di e menasa di un derame petrolero y a mira cu a cuminsa cu e trabounan pa pomp e material di crudo for di e deposito. Ultimo informe cu el a ricibi ta cu a logra saca mita di e cargamento caba. Sinembargo e 600 mil bari ainda ta forma un peligro.
Boekhoudt a splica cu mientras cu e barinan ta den e tanker y no sac’e, e ta keda un riesgo pa naturalesa. E procedura di pompmento di e crudo ta un riesgo riba su mes.
Un derame asina grandi semper ta un peligro pa areanan den bisindario. P’esey a bin cu e Tratado di Cartagena, estableci despues di dos derame petrolero grandi den 1979 y 1983. Un di e deramenan ey tabata esun di 287 mil ton, un di e mas grandinan di e tempo ey, banda di Trinidad & Tobago.
Un derame tin consecuencia pa tur e especienan marino den e area, pero tambe nan habitat. E promenan afecta ta e parhanan, cu ta busca nan cuminda na lama. E ta splica cu su si nan pega cu azeta, nan por hoga of muri di hamber. Otro ta e delfin y bayenanan cu mester hala rosea. Si nan pasa door di dje, e azeta ta drenta nan pulmon. Pero tambe e azeta ta pega riba e otro especienan y na su turno ta crea un escasez di cuminda di lama, of ta un riesgo pa ser humano.
No mester lubida e turtuganan cu tambe ta bini ariba pa hala rosea y consecuentemente lo afecta nan.
A palabra den e grupo cu no ta bay concentra riba e azeta pega riba e barancanan, pero si e beachnan afecta mester atende mesora. Asina haya melding cu el a cuminsa plama, lo studia e clima, su movecion pa mira unda probablemente e lo yega prome y ta aplica e procedura cu nan tin prepara caba. Beachnan turistico lo haya atencion mas urgente y haci uzo di mas tanto ekipo posibel pa minimalisa e impacto.