Departamento di Malesanan Contagioso ta haciendo varios trabao. Nan ta bezig cu un cantidad di vacuna na diferente grupo den comunidad.
Y esaki ta pa evita cu mañan problema por bati na bo porta cu influencia. Awe, Departamento di malesanan Contagioso tabata na MFA Paradera y ta cla pa duna vacuna na esnan cu mas tin mester y esnan cu kier proteccion.
John Henriquez, enfermero na departamento di Malesanan Contagioso, a splica cu for di diabierna cu a pasa a cuminsa cu e campaña di vacuna. E ora eynan nan tabata na nan propio oficina. A cuminsa duna vacuna eynan, cual a bay hopi bon. Tabata tin un acogida basta grandi. E siman aki a cuminsa cu ayera, na MFA Noord, caminda cu tambe personanan a yega, vooral e hendenan grandi y tambe personanan cu ta cay bao di grupo di risico. Awe nan tabata na MFA Paradera. Mañan diaranson, nan ta na MFA Savaneta. Diahuebs nan ta na Imsan na San Nicolas. Nan ta bezig cu e campaña. Nan kier y ta desea pa e publico, vooral e personanan cu ta cay bao di e grupo di riesgo, pa por fabor, bay na boso dokter di cas. Si boso ta bao di 60 aña pa asina boso haya e receta pa bin tuma boso vacuna.
Personanan riba 60 aña, nan ta bin cu e AZV valido naturalmente y esey caba ta suficiente pa bin na remarca pa haya e vacuna. Te cu asina leu, por bisa cu e poblacion ta respondiendo basta bon pa loke ta e vacuna. Pero si ta desea pa mas persona bin tuma e vacuna, pasobra si bo bay ripara bon, e grupo di riesgo aki na Aruba y vooral e grupo di e personanan di 60 aña pariba ta grandi. Toch ta wak cu aunke e poblacion ta respondiendo na e campaña, pero toch ta desea di mas persona cu ta cay bao di e grupo di riesgo, bay tuma e vacuna, pa asina ey, evita mañan cu ta bay bira malo, bo ta bay haya un Influenza, of un griep pisa, caminda cu bo por haya problemanan di rosea cu bo ta termina den un ICU y tin casonan cu por ta fatal tambe.
E ora ey ta haci un yamada un biaha mas na e poblacion, por fabor, bin. Muchanan chikito tambe. Bo por cuminsa haya e babynan di 6 luna, te cu 35 luna, por tuma e vacuna. E dosis e ora eynan ta menos, pasobra pa adulto normal of pa 35 luna p’ariba, e dosis ta 0.5 cc. Pa muchanan bao di 35 luna, nan ta haya mita dosis di dje. E ta importante pa nan tambe. Si bay wak bon, hopi biaha na crechenan, bo ta manda bo yiu, despues e ta bin cas, dos dia despues, ata mucha ta cu verkoud, cu un tiki griep. E ora eynan ta bon pa e muchanan bin tuma e vacuna tambe. Asina eynan na creche ta evita cu tin e problema cu Influenza of cu griep. Banda di dje tambe, tin cu corda riba e parti di higiena. Ora cu por ehempel tin muchanan cu griep, percura pa na e crechenan tin e handsanitizers, desinfecta e cosnan di hunga, riba e mesa, riba superficie. Ora cu ta niester e ora ey por plama e virus rond. Asina eynan e ta wordo pega na otro persona.
