Dialuna awor, dia 18 di november 2019, Departamento di Impuesto (DIMP) ta cuminsa cu e campaña pa yena formulario di declaracion di “Inkomstenbelasting 2018”. Esaki lo sosode den dos diferente districto y pa dos siman largo. Di e forma aki DIMP ta purba di ta mas cerca di comunidad y brinda asistencia gratis na nan  contribuyente. 

Lo yuda yena e formularionan di declaracion di impuesto di entrada for di dialuna dia 18 pa diabierna dia 22 di november 2019 na YMCA San Nicolas, for di 8’or di mainta pa 4’or di atardi, nonstop. E siman despues, for di dialuna 25 pa diabierna 29 di november 2019, na Biblioteca Nacional na Oranjestad, for di 8’or di maita pa 4’or di atardi, nonstop.

Kendenan por participa?

  1. Tur persona soltero cu tin un entrada bruto di no mas cu Afl. 75.000.
  2. Tur persona casa cu – hunto – tin un entrada bruto di no mas cu Afl. 150.000.

Ta importante pa tene na cuenta cu no por brinda ayudo na esnan cu tin un empresa propio of cu ta traha riba nan mes.

Departamento di Impuesto (DIMP) ta invita  tur contribuyente cu tin mester un ayudo cu yenamento di e formulario di declaracion di nan entradanan di aña pasa, pa probecha di e oportunidad aki. Trece tur bo pruebanan di gastonan haci y entradanan ricibi, copia di identificacion valido, carta di interes di hipoteca, interes riba fiansa, interes riba carchinan di credito y mas. 

Departamento di Impuesto (DIMP) ta conta cu 263 empleado dinamico, dedica y bon prepara pa brinda e miho servicio posibel na nos comunidad. Hunto ta cobra mas di 1 biyon florin anualmente na e diferente impuestonan cu nos pais conoce, cu ta bay bek pa cubri e gastonan anual di nos pais. Pesey, cumpli cu impuesto, ta cumpli cu Bo pais!

Comments

comments