Departamento di Impuesto tin diferente plannan riba infrastructura rond di nan edificio parti pafo cu a palabra cu esnan concerni pa yega na algún cambio nan.
Directora di Departamento di Impuesto, Luenne Gomez-Pieters ta bay un tiki den historia, relatando cu nan a drenta den e edificio actual na 2008.
Antes nan tabata ubica den Paardenbaaistraat, caminda cu DIMAS ta situa actualmente.
E edificio actual, e departamento ta huur for di SOGA desde e aña ya menciona. Awo cu nan tin 10 aña den e edificio, tin cierto cosnan cu a mira cu mester bin mehoracion den nan. A sinta den un manera masha profesional na mesa cu SOGA, caminda cu a vocifera algun punto di atencion caminda cu ta mira cu tin espacio pa mehoracion, no solamente pa e accesibilidad pa e clientenan pero tambe pa e personal di Departamento di Impuesto.
Si mira e parkeerplaats cu tin pa loke ta personal, na 2008 caba tabata un punto di atencion cu e parkeervaken tabata mucho chikito. Esakinan lo mester wordo amplia. Nan ta bezig hunto cu SOGA pa mira si por pinta esaki di nobo. Tambe a bin ta haya feedback di clientenan cu tin mester di un handicap parkingspot, cu no tin esaki disponibel. Si tin casonan caminda cu lo mester haci uzo di e servicio di ambulance, ora cu un cliente of empleado bira malo of tin un dril pa loke ta ontruiming di e edificio of si tin un calamidad, caminda cu brandweer, polis y tambe ambulance lo mester ta presente no tin un luga actualmente special pa e truck y autonan grandi aki pasa y/of para.
Un otro punto di atencion ta e falta di un zebrapad pa peaton y tambe un borchi dilanti di e edificio cu ta prohibi e autonan pa para net dilanti di e edificio. Esaki ta forma un peliger durante etemporada cu ta hopi druk y mester entrega formulario y/of haci pago. Autonan ta para dilanti di e edificio y ta stroba e fluho di trafico y consecuentemente por tin accidente nan cu por sosode.
Mester mas luga
Tin mester mas luga pa parkeer pa por absorba e fluho di cliente cu ta bin haci nan pago nan di impuesto na Departamento di Impuesto. Por mira cu ora cu tin deadline pa paga impuesto tin varios incidente cu a pasa y por a pasa pa motibo di falta di espacio. Un parti di e mondi a wordo rosa. A pone atencion tambe cerca SOGA y tambe DOW pa e awa cu ta para despues di un yobida duro. Mester por wak con por drain esaki y percura pa por conecta cu otro tuberianan cu ta core bao di tera. Gerencia di DIMP ta contento cu nan tin un bon liña di comunicacion cu SOGA y cu ta dispuesto pa haci e cambionan chikito aki pa por acomoda e empleadonan di Departamento di impuesto y tambe e clientenan. No solamente e accesibilidad di e edificio ta importante pero tambe e siguridad riba e tereno di Departamento di Impuesto.
Gastonan
Tin cierto gasto nan cu SOGA tin presupuesta cu nan por carga y tin otro cosnan cu DIMP ta tuma na su encargo. Si por ripara, tur e borchinan pafo cu tabata tin, tabata borchinan blikia. Borchinan cu tabata tin nomber bieu di e departamento, cu ainda tabata visibel. A cambia esakinan y ta algo cu a pisa riba e presupuesto di DIMP. Otro cosnan cu ta trata encargo di SOGA, ta algo cu SOGA tin cu haci y DIMP ta contento cu nan tin oido pa cu e cambionan aki.
