Departamento di Asuntonan Economico, Comercio y Industria mediante su unit di Iniciativa pa Desaroyo pa Empresa Arubano (IDEA) y cu colaboracion di su unit Establecimento di Negoshi a organisa un tayer: “Business License” riba 16 di maart 2023.
E orador, Mary Baarh, hefe di e unit di Establecimento di Negoshi (Vestigings van Bedrijven) na Departamento di Asuntonan Economico, a presenta lo siguiente:
· Definicion di negoshi
· Den ki forma legal por opera un negoshi
· Kico tur ta prohibi bou di Articulo 2 di e Ley di Establecimento di Negoshi si no tin e permiso necesario
· Ken tur mester di un permiso pa negoshi
· Pa cua compania y institucion e ley aki no ta aplicabel
· Banda di e ley, kico e Guia di Maneho nobo ta encera
· Tres categoria cu ta cay bou persona natural
· Ken tur por cay bou di persona categoria LOCAL
· Ki ora por nenga un permiso
· Gastonan di un permiso pa negoshi
· Ki tur mester considera ora di scoge un nomber comercial
· E servicio cu seccion di Establecimento di Negoshi ta ofrece
· Demostracion di nos website www.deaci.aw pa haci peticion pa permiso den forma digital
· Con pa monetaria e proceso di bo peticion online via Join Information Portal
· Ki tur mester tene na cuenta cu ne prome cu cuminsa un negoshi
Durante y despues di e presentacion e orador a contesta tur e preguntanan cu bin di parti di e participantenan. E contestanan ricibi tabata satisfactorio y comprendibel.
E tayer aki a tuma luga na Departamento di Asuntonan Economico y a haya un participacion di en total 34 persona. IDEA ta sumamente contento cu e contenido di e tayer y tambe di e bon comentarionan ricibi di su participantenan na final di e tayer. E contenido tabata sigur hopi informativo y interesante.
IDEA su eventonan ta dedica na SMEs (Small & Medium Enterprises) y tur cu ta desea di cuminsa un negoshi y cu kier educa nan mes riba diferente topico comercial.
Un danki na tur e participantenan y un danki special na e presentado di Departamento di Asuntonan Economico cu a comparti su experticio cu tur esunnan cu tabata presente durante e tayer. Mirando e interes grandi den e topico aki, IDEA lo bay ripiti e tayer aki un biaha mas den e aña aki.