Pa medio di su cuenta riba e plataforma di media social Facebook yama Candelario Ambrosio Wever (Booshi) a haci un denuncia diamars atardi cu un potret cu, segun e politico, e mes a saca. Ta trata di desperdicio toxico di origen medico tira den dump na Parkietenbos, sin ningun tipo di e precaucionnan necesario.
Ex-lider di partido UPP y ex-minister ta acusa e actual Minister di Medio Ambiente, Ursell Arends (RAIZ) di no ta haciendo uzo di e insinerado caminda cu esaki ta un di e desperdicionan mas facil pa kima den dje. Tambe ta cuestiona dicon ningun departamento, consehero of fundacion al caso ta haciendo algo al respecto.
A continuacion, e denuncia textual di Booshi Wever:
“J’ACCUSE!!
Increibel pa kere e potret aki cu AMI a saca di nos dump! Mientras cu e minister nobo tambe a scoge pa tapa e PORKERIA cu OTMAR a bin cu ne! Mira kico ta sosodiendo na Parkietenbos. Mira “medical waste ” djis benta na Parkietenbos!!! Dicon e no ta wordo kima?
Esaki ta e desperdicio mas facil pa kima den e insinerado. Of e “PORKERIA” cu O.O. cu sosten di EWC via CORUPCION a cumpra no ta sirbi!!!??
Ainda awe e minister Ursell Arends por sigui bisa cu ta algo super bon e insinerado aki ta?
No tabata tin ningun hende cerca di O.O. cu por a lanta un “red flag” pa evita cu e corupcion aki tuma luga? P.e. un Marlon Croes, Sra. Zaandam cu awe ta man drechi tambe di MinPres. EWC cu a hereda esaki ora cu a core malamente cu un minister, Rocco y demas Parlamentarionan di e tempo ey, cu a haya tur documento pa wak y tabata wordo informa, mescos ami tabata wordo informa??? Unda nan ta?? Keto y sordo mudo!!!
DOW of DNM no ta controla? Aldrich Croes y su “fundacion”, unda nan a keda? Nan no a declara cu e insinerado ta un salbacion pa e bario? Asina aki ta e salbacion! Si esaki no ta tapamento di corupcion, anto mi no sa mas! Of kisas mi mester keda keto y mi no mag di critica? Of mi mester bisa cu esaki ta djis algo bon?
Comete corupcion y tapa corupcion ta mescos. Nan NO ta integro!!
Potret no ta gaña!!
Te aki e texto manera cu a keda publica.
Manera tabata di spera, e publicacion rapidamente a haya diferente reaccion, comentario y tambe share. Tambe lo mester determina, si ta posibel, for di unda e desperdicio medico aki a bin y si a cumpli cu reglanan estableci pa deshaci di dje.
