Denuncia contra trahadonan ilegal riba muraya di DIMAS

Probablemente den oranan di madruga algun persona a dicidi di vocifera nan malcontento pa e forma di traha di DIMAS dor di flit un griffitti cu mensahe riba e muraya den Paardenbaaistraat. E mensahe tin di haber cu un grupo di 30 trahado Mexicano ilegal trahando na Aruba Marriott Resort & Casino.

 

Director di DIMAS, mr. Kathy Ruiz-Paskel a yama Polis pa entrega keho di vandalismo na propiedad di Gobierno. Polis a cuminsa un investigacion mesora y probablemente lo haci uzo di sistema di camaranan den vecindario pa yega na e malhechornan envolvi den e acto aki.

E mensahe skirbi riba muraya ta papia di cu tin 30 Mexicano trahando na Aruba Marriott Resort & Casino sin papel (permiso di trabou) ademas a menciona pa Ski, sosega na paz.

For di Aruba Marriott Resort & Casino nos a compronde cu nan NO tin ningun grupo di trahadonan Mexicano den servicio, ni directo ni indirecto. Siman pasa ainda tabatin control na e propiedad y no a topa ningun trahado ilegal. E hotel a pone como condicion cu trahadonan di e contratistanan trahando den e hotel mester por mustra un permiso valido pa por subi tereno di e hotel.

DIMAS a keda di pidi DIP pa duna un man mesora pa verf e muraya y kita e mensahe skirbi den forma di vandalismo riba muraya di e edificio.