Dentistanan ta den un situacion dificil na e momentonan aki desde cu nan a haya informacion dia 19 di juni cu AZV lo corta den e pakete oral pa adultonan. E pakete tabata cubri consulta, x-rays, recetanan, rancamento di djente, etc. y esakinan lo sali afo. E asociacion di dentista a vocifera nan preocupacion pasobra e medidanan asina lo trece problema grandi pa esnan cu mester di dje.
E dentistanan ta mira pashentnan cu ta haci uzo di e servicio aki. Segun Marielle Ho-Kang-You di e asociasion di dentistanan, nan a skirbi un carta pa AZV y vociferando nan preocupacion y e manera radical cu ta scrap e pakete aki pa adultonan. A manda e mesun carta pa Minister Presidente, Ministernan Oduber y Croes, IVA y Parlamento.
E asociascion a sinta di biaha cu Parlamentarionan, kendenan no tabata informa loke AZV a manda gobierno como un proposicion pa spaar 5 miyon pa luna, cual ta un opdracht nan a haya pa haci. E medidanan aki mester a drenta na vigor dia 1 di juli, pero a hala esaki atras. No ta sigur pa ki tempo esaki lo ta na vigor aunke cu tin indicacion cu esaki lo ta pa 1 di augustus.
Hopi pashent no por sin e cuido basico y splica Parlamento tur esaki. E cuido aki ta super basal y kier a haci hopi cos mas. E cuido aki ta data como 50 aña pasa den temporada di pashentnan di PPK y desde cu 20 aña pasa AZV a bini na vigor, a tuma esaki over. Awo kier kita esaki masal, specialmente pa esnan mas vulnerabel di sociedad. E asociacion di dentista a sinta cu directiva di AZV despues di a sinta cu Parlamento.
Segun Ho-Kang-You, a puntra si por tin un posibilidad di wanta e esencial basico den e pakete oral y a haya un no como contesta. E asociacion ta considera cosnan aki importante, pero pa AZV esey no ta cuido basico y no lo papia di dje. Nan ta di pensamento cu e costo lo ta mas hopi awo, pasobra pashentnan cu dolor lo bishita nan dokter y lo haya remedinan. Pero esey no lo yuda e pashent su problema.
