“Nos intencion awe tabata, por medio di e oradornan, pa demostra e conexion cu tin entre Aruba y Hulanda”, asina Nico van Grieken, presidente di Venootschap Nederland-Aruba, a conta despues di e evento, organisa den e Koninklijk Theater Diligentia na Den Haag, Hulanda. E evento a conta cu presencia di Su Altesa Real, Prinses Beatrix, Burgemeester di Den Haag y varios otro autoridad di Gobierno di Hulanda. Lamentablemente ningun miembro di Gobierno di Aruba tabata presente na e evento, pa motibo di otro compromiso.
Ta den e cuadro aki, Genootschap Nederland-Aruba a dicidi di organisa nan evento di hubileo di 25 aña cu tres orador invita. Ta precisamente pa enfoca riba e futuro relacion den Reino Hulandes, con e por ta miho y pa cumpli cu e necesidadnan di aña 2022. Mester tene cuenta cu nos statuto ta di aña 1954 y tur hende ta di acuerdo cu entretanto e circunstancianan den Reino Hulandes a cambia hopi.
E tres oradornan invita y cu a hiba palabra durante e evento tabata e Rector Magnificus di Universidad di Aruba, dr. Viola Heutger tocante e futuro di educacion avansa na Aruba. A sigui despues cu e presentacion di antropologo Francio Guadeloupe titula “E legadonan: tocante e beyesa y tragedia di Caribe Hulandes’ y finalmente e historiado Gert Oostindie a elabora tocante ‘E incomodidad den relacionnan di Reino’.
E evento a conta tambe cu presentacion di e escritor Frida Winklaar-Domacassé cu a recita varios poema. Ademas tabatin un presentacion di e guitarista Jean-Jacques Rojer.
E hubileo tabata dedica tambe na e miembronan di honor, esunnan cu a funda e organisacion 25 aña pasa, manera ta e comerciante y inversionista local Eduardo de Veer. Nan tabata invita pa scucha e oradornan pero tambe pa topa cu e Prinses.
Despues di e ceremonia, SAR Prinses Beatrix a haya chens pa papia cu e tres oradornan invita y cu algun studiante invita. Tambe tabatin bendemento di buki local y presentacion di cah’i orgel. E invitadonan den su mayoria tabata Rubianonan biba na Hulanda pero tambe a bota algun comerciante y abogado local memey di e publico.