E participacion di Minister di Finansa cu e entrada extra riba BBO, etc, tabata decepcionantemente menos cu loke Gobierno a anticipa, no mester a bin di sorpresa pa ningun hende y menos pa su persona y su conseheronan. Ora Bo saca mas awa cu un pos ta produci, e pos ta seca y bo ta keda sin awa at all. Tog, sin ningun creatividad a bay pa e cos mas facil . . . sigui chupa te ora cu no tin awa mas.
E decision pa primi e delaster un gota for di pueblo tampoco mester a bin di sorpresa, pa motibo cu den pasado a purba e mesun formula aki caba y e unico cos cu el a produci tabata un economia reduci, den pleno recesion, matando e poder di compra y comberti e factibilidad di haci negoshi den un mision imposibel. Banco Central a anticipa esaki publicamente, pero Gobierno a lapi e opinion profesional aki na su sapato.
Aruba a drenta un economia comprimi caminda pueblo no ta gastando menos djis pa spaar, sino ta gasta menos como cu e no tin mas pa gasta, ya cu tur cos a bira asina caro cu hasta cumprando cosnan di menos calidad pa por paga menos, e no por yega fin di quincena of fin di luna cu placa den su cartera. E dolor cu pueblo ta pasando aden no lo bira menos. Alcontrario, cada luna e ta birando pio.
Gobierno ta secando e pueblo manera un pruim den solo te ora cu e keda na cuero y pipita. E pueblo no tin mas vet na su curpa pa corta. Unda gobierno a bin cu e ilucion di tin tanto miyon den nos comunidad pa saca ainda?
Gobierno mas cu tur hende mester sa con grandi e grupo ta cu tin un salario minimo y tog ta bin cu medida pa ranca miyones di nan cartera.
Tur e bunita splicacion y palabranan di gobernantenan ta envano. Cu palabra y teoria fofo no por substitui e dolor cu pueblo ta pasando aden. Di bola e pos tabatin awa y awor a caba di sek’e.
