Un problema cu a inicia awetardi pa mas o menos 5:20pm a desaroya y bira un problema masha grandi cu WEB Aruba NV no por maneha cu consecuencia cu henter e planta a bay “down”. Ta e di dos reto gigantesco riba nomber di e director di WEB, esta Luis Oduber. Despues cu Aruba tabata conoce e scenarionan aki despues di hopi aña, awo a para bira cu den menos di 1 aña nos ta para na e mesun crusada.
Informacion cu a yega na redaccion di 24ora.com ta indica cu e feedernan Elmar 1, 2 & 3 a cay afo. Comosifuera poco e turbina di gas tambe a confronta problema pa start. Dado momento Valero #2 a cay afo y un Boiler a trip. E informacionnan aki ta circula riba red social, pasobra ambos compania no ta suministrando ningun informacion ainda na pueblo.
E hecho cu na nos pais bisiña Venezuela nan ta pasado den hopi problema cu demanda di energia, e ta duna un impresion comosifuera e problemanan a crusa lama y yega Aruba. E ta ironico pasobra aki constantemente e compania ta anuncia inversionnan grandi den ekiponan moderno pa por maneha produccion y distribucion di awa potabel y coriente pa henter nos isla.
E ultimo Black Out a sosode dia 11 di mei 2018. Prome cu esey tabata diasabra dia 30 di Juli 2016. Pues despues di casi 2 aña a haya nos mes den e mesun situacion.
E “Blackout” prome cu 2016 tabata esun di diabierna merdia 23 di october 2015. E tempo ey WEB a bisa cu un “Root Cause Analysis” lo mester a saca afor kico a conduci cu Elmar a benta WEB abou. Na WEB tin 7 feeder y ora cu feeder number 4 a cay afo, automaticamente e ta benta tur otro abou, mandando e operacion di WEB plat.
E situacion similar prome tabata di Diasabra 5 di januari 2013 ora tambe a conoce un caso di “Blackout”, debi na un fayo den suministro di combustibel den un di e boilernan na WEB. E dia ey coriente a bay 10:11or mainta y ta te 6:58 or anochi a caba di reconecta e ultimo cliente riba e red di distribucion di coriente.
Un cos ta sigur, cada biaha cu tin “Blackout” ta paralisa henter nos isla, economicamente, socialmente y asina por sigui menciona. Ex Director di NV Elmar, Ing. Rob Henriquez a yega di comenta, prome cu a core cune politicamente, cu pa cada ora cu no tin coriente, ta costa alrededor di 100 mil florin na gasto. Esey ta interno, sin conta e falta di haya entrada na uzo di coriente y e impacto economico.
