Den Ciudad Oraño Janesis Cano ta interpreta e personahe di Liliana. Liliana ta un hoben cu idea ta mat’e, e ta arogante, antipatico y ta causa bastante problema. Liliana ta e “mean girl”
“Mi a hay’e sumamente interesante pa haci e rol aki ya cu e personahe ta completamente diferente na loke ami mes ta”
Actualmente Janesis ta bishitando Colegio E.P.I den e sector di Salubridad & Servicio y den su tempo liber e ta un voluntario activo di Rode Kruis. Janesis tin 19 aña. Su hobbynan ta actua, modela, landra y yuda na Rode Kruis.
Na aña 2013 Janesis a conoce Juan Francisco Pardo ora el a participa den e proyecto di Tribi Soña y e pelicula Abo So pa cual el a haci un audicion pa forma parti di e pelicula. Despues di e proyectonan aki el a sigi e proyectonan di Juan Francisco. Na 2016 Juan Francisco a cuminsa cu Into Acting Youth Club na unda e hobennan a haya e oportunidad pa forma parti di Ciudad Oraño.
Janesis tin bastante experiencia cu actuación. El a actua den e pelicula cortico Desvia. Actualmente e ta actuando den e produccion di Riba Liña Peligroso 2 y den e produccion di Un simpel no por a cambia mi bida. Tambe el a aparece den otro peliculanan manera figurante.
“Mi experiencia tabata uno sumamente educativo. Mi a siña hopi no solamente di actuacion pero tambe mas di mi mes. Dus cu actuacion bo ta revela bo mes. Mi ta mas open y tin mas confiansa den mi mes. Loke mi a gusta mas ta e momentonan tras di camera cu e cast y e crew cu semper a sa di pone mi hari y sigur a laga mi cu bon memorianan di e produccion di Ciudad Oraño.”
Dificil pa Janesis tabata cu cada rato e tabata pensa cu si su expresionnan di cara tabata bon of dimas. Pero na final e ta reflecciona cu mas e actua, mas e ta mehora.
Den Ciudad Oraño ta bin pa dilanti hopi problemanan social comun na Aruba. Hobennan lo por relaciona nan mes cu e personahenan di Ciudad Oraño, y e adultonan lo por wak e problemanan social mas for di e punto di bista di e hobennan.
Na e publico, Janesis kier comparti cu cada un di e actornan y e crew a pone hopi esfuerso y dedicacion den Cuidad Oraño. E ta spera cu publico lo disfruta y siña mes hopi di e serie cu e team di Ciudad Oraño a disfruta y siña di e producion.
Janesis ta contento di por a forma parti di e proyecto aki cu ta e prome serie di television na Aruba. E ta spera cu lo bin mas productionnan asina den futuro. Esaki ta importante paso asina hobennan por pone nan tempo den cosnan positivo y cu sigur nan lo siña for di dje tambe.
Su mensahe na e hobennan cu ta interesa pa actua y ta sinti cu nan no tin curashi: “Boso tuma e reto, e ta bale la pena y sigur un experiencia inolvidabel. Niun hende no ta cuminsa ta actua perfecto hasta actornan cu porta tin 10 aña caba actuando ainda tur dia ta siña algo nobo. Semper corda cu no ta importa con grandi of chikito bo rol ta, loke ta importante ta e impacto cu bo ta laga atras.”
Ciudad Oraño ta estrenando diasabra prome di september na Crystal Theatre, cuminsando pa 7’or di anochi. E procuccion local lo wordo presenta den un forma hopi special, esta un Tapijt Cora Gala Primicia unda cu pa prome biaha lo mustra Ciudad Oraño den estilo di un pelicula.
