Den deliberacion cu tireshops riba miho forma pa deshaci di taira

Ayera nochi a tuma luga un reunion di contacto di redireccion di taira. Un reunion fructifero unda a elabora riba e procesamento di taira y tambe a duna oportunidad pa sugerencia y preocupacionnan.

Procesamento di desperdicio na Aruba y economia circular en general ta un topico cu ta rekeri mas educacion den nos comunidad y tambe sigur dialogo. Otro siman lo sinta un bes mas cu e stakeholdernan, e tireshops y esunnan cu ta den servicio di baki di sushi pa por sigui elabora riba e maneho nobo pa locual ta trata desperdicio di taira.

Mester menciona cu lo bin un aumento den e gasto di procesamento di e tairanan, cu awor por tira sin man riba e landfill na Parkietenbos, cu tur consecuencia di candelanan grandi cu ta cende regularmente eynan. E tipo di candela asina, no solamente ta peligroso pa e area, pero tambe ta riesgoso pa salud publico.

Minister Ursell Arends a haci un compromiso publico cu prome cu fin di aña, e lo cera dump na Parkietenbos. Pa logra esey e ta atendiendo cu alternativa kico pa haci cu e desperdicio cu ainda ta bay eynan, manera taira y sushi di mata den cura di cas of sushi despues di demolicion di edificio. Ora saca taira for di circulacion, ta elimina un di e problemanan mas bisto riba dump.

E meta ta pa cobra un suma adicional pa por entrega e taira na EcoTech Freezone na Barcadera of na Carentra na Barcadera tambe. Ey nan lo recicla e material cu por uza den e taira ainda y e resto di e rubber ta uza pa traha diesel cu ne. E mercado eyfo di taira ta di 1000 ton pa aña, cu ta traduci den 274 taira pa dia. Ta estima cu cada taira lo tin un costo di 3 florin mas of menos pa proces’e y sigura cu e no ta bay ni den mondi y pio riba dump pa por pega na candela despues.

E intencion ta cu entrante dia 22 di augustus 2022, lo stop di acepta taira na dump di Parkietenbos y lo mester deposita nan na sea EcoTech Freezone of Carentra na Barcadera. Tireshopnan mayoria bes ta busca un baki grandi y ta yena nan cu taira y ta paga pa peso. Aunke cu pa algun ta algo nobo, compania di auto Yrausquin tin basta tempo caba ta aplica e maneho aki y ta inclui e suma pa deshaci di e taira den e prijs di taira nobo.