San Nicolas Business Association (SNBA) a organisa un Town hall Meeting awe diamars anochi na San Nicolas pa suministra informacion relaciona cu e proyecto di Fast Ferry. Minister Chris Romero di Transporte y Comunicacion, encarga entre otro cu e proyecto aki, tabata invita pa hiba palabra. “Nos a trece Ton Jansen for di Hulanda, un experto riba e area aki, cu mas di 10 aña coriendo tras di e proyecto aki, pa reuni cu Inmigracion, cu Duana y mañan lo sigui cu otro stakeholdernan, manera ta ATIA, AHATA, etc”, asina e mandatario a duna di conoce despues di e reunion.
“E idea ta pa pone tur e stakeholdernan concerni, tur e departamentonan cu bo mester pa haci e proyecto aki un realidad, pa sigura cu tur nanishi ta den mesun direccion”, di acuerdo cu Minister Chris Romero. E mandatario ta convenci cu Gobierno, siendo e instancia cu ta determina maneho, mester informa e departamentonan riba e proyecto aki, pa nan sa kico Gobierno ta bin cune.Ta pesey mes a invita e experto di Hulanda, pa por aclaria tur duda cu lo por tin. “Mi por bisa awe cu sigur sigur e experto a haci esaki y mi ta kere cu e siguiente paso, hunto cu Minister Andin Bikker, lo tuma contacto cu Corsou pa asina ey cuminsa pone e pasonan necesario pa logra un cooperacion. Aki 6 luna nos kier ta asina leu pa firma un contract entre Corsou, Aruba y e posibel operador di e Fast Ferry aki”, e mandatario a termina bisando.