Aruba tin un record aña pasa den accidente fatal. No tin ni dato di cua tabata e ultimo aña den nos historia, cu Aruba a conta cu solamente 2 morto den trafico. Probablemente e maneho di Gobierno, banda di e esfuerso di varios departamento den Cuerpo Policial Aruba a aporta na e cifra abou aki, esun mas abou den Reino Hulandes den aña 2017!
Manera ta conoci, e ultimo añanan a inverti hopi den Cuerpo Policial Aruba, pa percura pa mas auto, motorcycle y hasta bicicleta pa aumenta e visibilidad di Polis riba caminda y pa haci mas na prevencion di accidente. Ta bisto cu e esfuerso conhunto a duna su frutonan aña pasa, ora a bati un record den menos accidente fatal riba nos isla.
Un di e bentahanan tambe tabata e ceramento di varios caminda grandi pa construccion di e Green Corridor, cu sigur ta percura pa un reduccion den velocidad. Awo cu e caminda ta habri bek, ta nota cu e velocidad ta subi atrobe, aunke cu e infrastructura awo ta traha precisamente pa evita accidente, dor di elimina tur e “zijstraat” nan cu tabatin antes riba e caminda grandi.
Accidentenan cu morto:
- Aña 2000: 15
- Aña 2001: 20
- Aña 2002: 18
- Aña 2003: 18
- Aña 2004: 14
- Aña 2005: 15
- Aña 2006: 15
- Aña 2007: 11
- Aña 2008: 20
- Aña 2009: 17
- Aña 2010: 17
- Aña 2011: 14
- Aña 2012: 17
- Aña 2013: 13
- Aña 2014: 07
- Aña 2015: 12
- Aña 2016: 10
- Aña 2017: 02
Repasando aña 2017 den nos region directo, pues den Caribe Hulandes, por tuma nota cu na Corsou aña pasa a raporta no menos di 18 accidente fatal. Na Boneiro a raporta 5 accidente di trafico cu morto, tur tabata hende homber. Na Sint Maarten a raporta 4 caso di accidente fatal aña pasa. Aunke Saba y Sint Eustatius, mescos cu Boneiro ta resorta directamente bou di Hulanda awo, e dos islanan chikito no tabatin ningun accidente fatal aña pasa.
Na aña 2017, Aruba a conoce 2 caso di morto den trafico. E prome a tuma luga diaranson 5 di juli, pa 6:20am, pabou di e rotonde di ex-Drive Inn Theater, ora un bus di Arubus a atropeya un e peaton Johnny Forrester, biba na Savaneta.
E di dos accidente fatal a tuma luga diasabra 19 di augustus pa 4:20am na altura di e cas Savaneta # 314. E hoben chauffeur Jonathan Dirksz a fayece na e sitio mes, debi na sla ricibi y riba dje e auto a pega candela tambe.
Claro cu cada accidente fatal ta di mas y ta laga un dolor inmenso atras cerca famia di e victimanan. Ta pesey di un banda e record ta zona bon pa tur cu ta haci un esfuerso dia den y dia afo pa haci nos trafico mas sigur, pero asina mes e trabou no ta cla ainda. E record lo ta e aña cu nos cera sin ni 1 accidente fatal.
E ta un reto pa nos tur, teniendo varios factor na cuenta:
• No papia na celular
• No manda texto tras di stuur
• No stuur si bo ta burachi
• Controla bo velocidad
Hunto nos tur por aporta na stop accidentenan fatal. E aña aki no tabatin accidente fatal ainda, pues nos ta na tempo pa sigui haci tur esfuerso pa want’e asina. E trabou no ta solamente di Polis, sino di cada un di nos cu ta participa diariamente den nos trafico.