Demasiado hende ta bin busca nan plachi di number den oranan di mainta mientras atardi pa anochi ta keto

942

Pa loke ta buscamento di plachi di number, manera cu ta conoci Departamento di Impuesto a saca un schedule, caminda cu a cuminsa prome cu e clientenan cu a haci nan pago di belasting durante luna di December.

Segun vocero di Departamento di Impuesto, Meverly Romano, a cuminsa cu e grupo ey prome y asina gradualmente ta keda bay segun e secuencia di e fecha cu e belasting a wordo paga, pa por parti e plachinan na un forma mas organisa y mas structura. 

No mester lubida, tin mas of menos un 85 mil vehiculo di motor registra. E ta un cantidad considerabel. Lo kier duna tur e plachinan aki den un solo biaha, pero e no ta posibel.

Tin cu haci’e den pida pida y asina eynan ta bayendo.

E siman aki ta atendiendo e clientenan cu a paga entre 15 y 21 di December. Mirando e ultimo dianan desde cu a cuminsa cu e partimento di plachi, te awor aki, loke a observa ta, cu e aglomeracion ta mas tanto parti mainta.

Parti mainta ta manece cu un cantidad basta grandi di cliente. A anuncia cu ta bay te 8’or di anochi. Den siman, ta traha di 8’or di mainta te cu 8’or di anochi.

E rij largo no ta necesario. Ta pidi clientenan cu si nan ta mira cu e drukte ta hopi grandi, pa nan por evalua pa bay bin bek durante dia.

Por a ripara cierto orarionan di dia, no tin rij na cierto parti. A ripara cu entre 12 y 3’or, no tin rij mas. E ora ta un bon momento pa esnan cu si por bin e momento ey, pa nan acudi cerca DIMP.

Tambe a ripara cu tin personanan toch ta keda mainta den e solo cayente, cual no ta necesario. Tin hende ta delicado di salud. Berdad tin tur comprension cu e solo ta hopi fuerte, pesey tambe a haci un recomendacion na e clientenan cu tin e problema di salud, of nan ta delicado di salud, pa no bin durante dia, pero bin entre 4’or y 8’or di anochi, pa asina despues di 4’or, ta cuminsa bira fresco, e ta mas agradabel pa warda.

Ta purba di atende tur hende. Ta zet in mas persona posibel. Manera cu tin tambe, tin cu tene cuenta cu e cantidad di personal cu tin disponibel.

Tin extra personal tambe ta cooperando. E ta bayendo, segun Romano. Solamente ta cierto oranan durante dia tin un drukte hopi grandi. Principalmente mainta.

Loke Romano kier recomenda, pa ora cu e rij ta hopi largo, ta bon pa evalua pa bay bin bek. Por ta merdia of mas laat atardi. Esnan cu no por cu e solo, pa acudi entre 4’or di atardi y 8’or di anochi y gustosamente ta yuda tur hende.

E ta algo cu djis mester tene cuenta cu esey un rato y e ta bay. No por bisa cu e ta bay malo, ni nada. Tabata tin algun incidente di personanan a pasa dilanti di otro den rij. A cuminsa zundra otro masha mahos mes. Pesey tambe tin personal di siguridad eynan. Ta pidi tur cliente pa tene cuenta cu DIMP ta haciendo su best pa parti e plachinan den e tempo mas cortico posibel.

Pero esey no ta kita cu tin cu tene cuenta cu tin un cantidad hopi grandi di cliente. Na momento cu un cliente no ta comporta su mes debidamente, a instrui personal di siguridad pa saca e personanan aki for di rij, pasobra comportacionnan asina no ta yuda ningun hende. Tin cu tene cuenta cu tin hende grandi presente, tin persona cu ta acudi cu mucha y no ta bunita pa sinta ta insulta otro asina eynan, segun Romano.

Demasiado hende ta bin busca nan plachi di number den oranan di mainta mientras atardi pa anochi ta keto

Demasiado hende ta bin busca nan plachi di number den oranan di mainta mientras atardi pa anochi ta keto

Posted by 24ora on Wednesday, January 16, 2019