Diahuebs atardi a tuma luga un reunion den Parlamento yama pa e Comision di Salud Publico cu AZV, despues cu diaranson tabata tin un reunion cu specialistanan medico y tambe e diferente asociacionnan medico, como tambe Imsan, pa asina por dialoga riba e puntonan cu tin actualmente pa loke ta e bezuiniging cu ta bay tin den cuido medico, cu ta algo cu ta poniendo hopi luz negativo riba dje. Hulanda a pone presion pa asina aki, cu si Aruba ta desea ta sigui haya fiansa publico, mester reduci e gastonan di AZV cu 5%.
AZV a bin cu diferente proposicion pa reduci e gastonan aki. Algun di nan ta gastonan den cuido dental, cual no a cay den mucho bon tera cerca e asociacion di dentista. Nan ta haya cu cuido dental ta uno cu mester ta hopi halto.
Parlamentario di fraccion di POR, Dellanire Maduro, a duna di su banda con e reunion aki a bay. E parlamentario a comenta cu Aruba, debi na e circunstancianan a haya su mes confronta cu un di e condicionnan, mara na e di dos tranche pa por haya e fiansa di placa.
Un di e condicionnan aki ta e besparing di 5 miyon florin pa luna pa loke ta aseguro medico, unda cu pa tur ciudadano, pero tambe pa e profesionalnan, cu pa AZV tambe tabata un sorpresa, tur persona cu ta compronde of cu ta bin di e area di cuido ta compronde cu un besparing asina abrupto a corto plazo ta algo dificil pa por cumpli y sigur den un forma responsabel.
Aseguro medico a haya su mes den un lapso hopi cortico cu mester a bin presenta un plan, mirando e exigencianan cu Hulanda a pone riba pais Aruba, pa cumpli cu e besparing aki, unda cu tur hende ta di opinion cu net na e momento cu ta den crisis, pa loke ta coronavirus, tin cu bespaar pa loke ta e parti di salud.
Berdad tambe ta importante pa remarca, cu den seguro medico mester busca manera pa restructur’e, mirando cu e leynan ta bieu. Pero ta importante pa haci e cos aki na un forma responsibel unda cu tin investigacion cu data y cifra, cu por bisa cu di berdad e tin e efecto positivo, di berdad e por bay resulta a largo plazo den algo bon pa nos ciudadanonan.
Fuera di esaki e comision a haya un splicacion pa prome biaha, unda AZV a splica a corto plazo, cua ta e miho manera pa bespaar, unda cu nan mes ta indica cu nan intencion ta pa no, netamente bay mishi cu cuido mes.
Por ehempel pa loke ta dialise, no bay kita esey for di e persona cu tin cu bay rond di dje den e caso aki, pa loke ta e parti di transporte. Por a mira con esaki a wordo asimila pa e comunidad, cu mester a bin cu un forma con pa yuda regla pa e personanan cu no tin manera pa yega, pa por haya e servicio aki, unda cu ta un cuido sumamente riguroso, cual ta tres biaha pa siman, 4 ora largo ta haya dialyse.
E ta circunstancianan sumamente dificil. E Parlamentario a indica tambe cu nan no ta contento cu “out of nowhere”, ta haya algo cu ta bespaar 5 miyon sin cu por tin un documento cu por splica con y kico y na unda.
Kico ta e meta su tras, en bes di ta algo cu ta bisa cu ta tene cuenta como ciudadano, ya caba ta pasando door di un crisis financiero. Algun hende tin 0 entrada. Algun hende ta gana menos di 60% di entrada.
Riba dje awor aki, ta hayando como condicion cu tambe mester bay cubri cierto gastonan di salud. E preocupacion mas grandi ta, na e hendenan di edad, personanan cu enfermedadnan cronico, cu ta haci uzo di servicionan medico regularmente.
Eynan, pa Parlamento e preocupacion. A haya splicacion con AZV ta purba un manera pa afecta menos.
Un di e puntonan ta inclui algun cambo den ley. Den esaki por mira cu mester por bin banda di e plan, mester tin un otro plan cu por bisa cua ta e forma cu nos profesionalnan y aseguro medico ta mira cu ta mas responsabel pa haci, cu por ta no ta 35 miyon pa fin di aña.
Por ta ta menos, pero cu por para tras di dje y por mira, cu esaki por ta un forma responsabel pa atende cu cuido medico.
Dicon ta corta
Ta papia cu tin hopi gastamento den dialyse y den cuido dental. Riba esaki e parlamentario a comenta cu nan no a haya documentacion, pero basa riba e presentacion di un model cu AZV a scoge.
Manera tur aña ta disponibel e jaarveslag di e instancia. Den e caso aki 2019, no a drenta ainda. A trece dilanti si cu a percura pa bin cu cierto besparing den nan mes directamente, pa loke ta aseguro medico, pa tambe corta internamente algun empleado, cu contractnan temporal, cual a wordo termina. Atrobe, e suma pa luna, ta uno sumamente grandi, segun Maduro.
Reunion cu stakeholders
Diaranson tabata tin representantenan di Respaldo, como tambe specialistanan cu ta cay bao di hospital y esnan cu no ta cay bao di hospital. Nan a expresa nan idea y preocupacion, cu si ta haya cu tin cu bay haci cu tur persona tin cu duna un contribucion pa yega na consulta, ki esaki por tin.
Na fin di dia, si kier spaar, mester bin un manera, a base di investigacionnan, di berdad a largo plazo ta spaar. Si kita cu un persona cu pa motibo di rason financiero, no por busca cuido medico y warda ora ta laat, na final di dia, ora e yega un hospital of busca cuido mas avansa, ora tin complicacion, e ta bay sali mas placa y ta afecta e calidad di bida di e pashent.
Ta un reto grandi pa pais Aruba y ta haci e tarea di Parlamento dificil, pero ta atende esaki den e forma mas prudente posibel.
Ta wardando pa mira cua informacion ta pendiente pa haya, mirando cu tin e comision di zorgtoelage, cu lo percura e intension, pa por cubri gasto di e personanan cu no lo por bay cubri’e, pa mira con extenso esaki ta y kico esaki en berdad lo bay cubri.
Carta di specialistanan medico pa gobierno
A Asociacion di Specialistanan Medico tambe ta preocupa. Nan a trece p’adilanti den un carta, manda pa gobierno splicando cu tin un limitacion pa loke ta e capacidad di ICU y cu ta habriendo e fronteranan di nos isla.
Como medico general, parlamentario Maduro a splica cu e no a haya e chens ainda pa por profundisa su mes pa loke ta e parti aki. Si ta importante pa por tin cosnan na ordo, na momento cu un persona tin necesidad di dje. Esey sigur mester ta na su luga.
Pa esaki, e parlamentario a splica cu e lo acerca pa haya mas informacion for di hospital, pa e wak su mes, e circunstancianan actual.
