Dellanire Maduro: Mi no lo ta parti di ningun partido politico

Parlamentario independiente Dr. Dellanire Y. Maduro MD a asumi e responsabilidad pa representa pueblo den Parlamento di Aruba 27 di januari 2020 y a bira e lider di fraccion femenino mas hoben cu a yega di existi den parlamento di Aruba.

Aña 2020 tabata e aña mas dificil di gobernacion, asina mes Dellanire Maduro a traha cu hopi determinacion y amor pa nos pais.

“E ta un honor y un experiencia unico di por traha den parlamento, specialmente den e aña mas dificil di gobernacion di nos pais. Nos a pasa un aña di hopi incertidumbre y un crisis sin precedente.

Pa algun luna caba mi tabata deliberando kico mi lo haci e aña aki. Mi a sinta evalua con mi lo sigui contribui na mi pais, kico mi ta wak mi mes ta haci den e aña nan mi dilanti mirando cu tin diferente forma pa contribui na nos pais, cu no necesariamente mester ta riba un lista politico.

Durante e periodo aki den parlamento parlamentario Maduro a traha como presidente di comision fiho di salubridad publico, asuntonan social y cuido di nos grandinan, un di e comision nan fiho den parlamento cu mas reunion a hiba. Maduro a representa Aruba den comision di salud y comision di igualdad di genero den Parlatino, durante reunionnan publico, encuentro publico entre otro a trece diferente sugerencia na gobernantenan na beneficio di nos pais, a vocifera precupacionnan, preguntanan di nos comunidad, a haci pregunta por escrito, a haci peticion pa diferente reunion, tambe a presenta diferente mocion durante reunionnan publico, a sostene diferente ley importante pa nos pais entro otro.

Dellanire Maduro a haal su titulo di licenciatura y doctorado na Costa Rica y a gradua como medico general na 2016, el a traha bou Wit Gele Kruis brindando cuido y guia na personanan cu enfermedadnan cronico manera diabetes y presion halto.

Cu 26 aña el a drenta arena politico pa contribui na su pais di forma nacional, specialmente den area di Salubridad Publico. El a traha 2 aña como consehero medico na Ministerio di Turismo, Salubridad Publico y Deporte unda el a forma parti di e comision di AruBig, a presidi comision cu a atende cu e cambio di ley di ‘beperking tabaksprodukten’, a inicia concepto di proyecto di screening (deteccion) preventivo di NCDs (diabetes, presion halto entre otro), duna conseho riba diferente tema, a traha hunto cu grupo di trabou interministerial Special Projects riba diferente proyecto, organisa diferente evento, tambe a traha riba e plan nacional cu ta atende cu problematica di cacho riba caya.

Maduro ta splica cu e no tabata un decision facil, “Mi a yega na e decision cu mi no lo forma parti di ningun lista politico e eleccion aki y cu mi lo bay sigui contribui na mi pais di otro forma cu e mes un amor y determinacion esey pueblo di Aruba por conta riba dje. Varios partido a acerca mi persona, mi ta gradici cada un di nan pa nan interes y pa mira e trabou cu mi a bin ta desplega den 1 aña y mey den parlamento di Aruba. Mi ta hopi orguyoso como profesional y hende muhe di por a forma parti di e Gobierno lidera door di Minister President mr. Evelyn Wever Croes, un profesional femenino cu tabata sa di dirigi nos pais den un crisis sin precedente den historia politico di Aruba. Mi ta gradici un biaha mas tur persona cu a deposita nan confiansa den mi persona durante eleccion na 2017, tambe na mi famia, coleganan, personal di parlamento cu di un manera of otro a yuda mi durante e periodo aki.”

Terminando Dellanire Maduro ta desea tur partido politico exito den e eleccion aki y ta urgi pueblo pa haci uzo di nan derecho di voto dia 25 di juni 2021 manteniendo na e reglanan di prevencion.