Recientemente por a mira delfin den areanan cerca di costa di Aruba. Ta importante pa duna delfinnan e espacio y no molestia nan, pa nan luganan di refugio no bay perdi. Esey lo pone nan sobrevivencia na peliger y Aruba ta perde tambe un bunita herencia unico. Esaki ta loke e fundacion Aruba Marine Mammal Foundation (AMMF) ta splica den un declaracion.
Aruba Marine Mammal Foundation y stakeholdernan di un di e areanan conoci como refugionan di delfin, tawata tin mas cu un siman colaborando pa mantene keto e presencia di 2 delfin Roughtoothed (Steno bredanensis). Un medida necesario y introduci pa varios aña, pa evita aglomeracion di boto y hende. Ta necesario pa duna nan trankilidad ora cu nan ta yega asina cerca di costa.
Riba diahuebs, 7 di januari, algun delfin mas a drenta paden, y despues mita di ful e grupo a pasa busca e otronan y bolbe lama grandi, mescos cu otro biahanan. Algun usuarionan di lama na e sitio a wordo sorprendi cu nan bunita presencia inespera. E grupo ta inclui 2 baby y un adulto na estado. Como cu tin uno na estado, posiblemente nan lo keda cerca. E especie aki ta esun cu ta uza e area di refugio na Aruba cu mas frecuencia.
Cu colaboracion interinsular desde 2008, y e metodo di “dorsal fin ID matching” a logra comproba, cu e grupo aki ta keiro entre Aruba, Corsou, y Boneiro
E refugio
Di e 34 sortonan di delfin y bayena den Caribe, Aruba tin 20 cu sa yega aki banda. Aruba ta hopi unico den sentido cu aki tin 6 sorto di delfin (1.Roughtoothed 2.Bottlenose 3.Spinner 4.Atlantic spotted 5.Pantropical spotted 6. Striped ), cu ta busca refugio regularmente, y pa decadanan largo, na luganan specifico cerca di nos costa, di cual e dosnan mas importante ta e area di Arashi/Boca Catalina/Malmok y Mangel Halto/Spaans Lagoen/Balashi. E area di Mangel Halto ta forma parti di Parke Marino Aruba, cu ta cay bao Fundacion Parke Nacional Aruba.
E luganan aki tin un eco sistema rico di nan cuminda, y e delfinnan ta drenta ora den necesidad di refugio pa duna luz, ora nan ta criando recien naci, of ora nan ta recuperando di herida. Na e refugionan aki di poco profundidad, e circunstancia di presencia di delfin ta totalmente diferente cu ora nan ta pafo riba lama profundo, caminda nan ta acerca boto pa por ehempel haci “bowriding”. Nan ta bin paden, pa un motibo di necesidad di proteccion, durante momentonan vulnerabel y debil pa cu nan sobrevivencia. Nan ta keda henter un dia y bay durante bahada di solo, of sa keda simannan largo. Den pasado nos a yega di mira 4 naceento dentro di 2 siman y recuperacion di herida di un dia te cu 1 siman.
Presencia di orca y tribon den nos lama, y evidencia local di atakenan di tur dos riba delfin y bayena, ta entre otro motibonan cu nan ta busca refugio di proteccion den e areanan aki, durante momentonan debil di nan grupo. Ta hopi importante pa no stroba nan y percura pa nan por permanece trankil den nan refugio.
Ora e delfin Roughtoothed ta duna luz den e refugio, parti di e grupo ta keda landa den forma di carousel rond di e mama y su ayudantenan. E recien naci ta wordo yuda dianan largo pa hala rosea na superficie, landando sincronisa memei di 2 pa 3 adulto cada banda. Otro parti di e grupo di delfin salvahe, ta move rond den vecindario, y sa acerca landado y sambuyadonan. Si esey sosode, e codigo di conducta corecto ta pa semper keda pafo di e grupo di delfin, drif den forma trankil cu brasanan pega na bo curpa, purba observa si tin un baby of uno cu herida of en reda cu cabuya (avisa AMMF pa ayudo).
No persigui nan, no purba di mishi of gara nan. No tira cuminda pa nan. Ora nan rabia, nan lo bati cu nan rabo riba awa of dal den bo, pushabo pa halabo. Na Aruba, delfin a yega di dal hala landadonan cu a yega mucho cerca, ranca na nan paña, y un caso di atake mas agresivo di dal duro den barica di un persona cu tabata snorkel. P’esey, desaloha poco poco di e luga pa bo mesun siguridad. Si bo ta cu boto den e area nan di refugio, y bo nota grupo di delfin, desvia y mantene e boto na distancia leu y no acerca nan. E codigo di conducta corecto, describi akinan, pa cu interaccion di hende/boto cu delfin salvahe, ta fundamental den reglanan internacional.
Den pasado, delfin salvahe den refugio na Aruba, a atrae aglomeracion di hende y boto, cu a molestia nan gravemente. Esaki a inclui pasa cu boto me-mei di e grupo di delfin, persecucion cu grupo di botonan, bula den awa riba lomba di delfin, grupo di landado cu a bula den awa cu tamborin pa haci baile cu delfin, tira hotdog, kenepa, weso di galiña, y kipashi pan den saco di plastic pa delfin come.
Ora hende no ta sigui e conducta corecto, nan ta pone nan mes siguridad y e sobrevivencia di delfinnan na peliger. Ta comproba cu molester di aglomeracion di hende y boto den nan cercania, tin impacto devastador pa delfin y bayena. Banda di e peliger di wordo herida fisicamente, tambe nan ta reproduci menos y nan ta disparce for di luga di custumber pa refugio. P’esey mundialmente, tin ley y reglanan estricto pa nan proteccion.
Proteccion
Na Aruba tur especie di delfin y bayena ta proteha pa ley. Ta prohibi pa causa nan molester of haci nan daño. Esaki ta specifica den nos Natuurbeschermings verordering AB1995.2 y Landbesluit Bescherming Inheemse Flora en Fauna AB2017.48 y tambe den e tratado internacional cu nos ta forma parti di dje, cu ta e SPAW Protocol / Cartagena Convention.
Siguiendo e Marine Mammal Action Plan di e tratado di SPAW, pa tur pais tin su “stranding network” (red di varramento), Aruba Marine Mammal Foundation (AMMF) ta e instancia den e red encarga como first responder, cual e ta eherce desde 1999, y cu a duna oportunidad pa colecta y publica dato scientifico riba delfin y bayena na Aruba y regional.
Gradicimento
Cu hopi aprecio AMMF ta gradici tur cu ta colabora y contribui na proteccion di delfin salvahe y nan refugio. Nan union di esfuerso ta crucial pa por logra nan proteccion.
Ta importante pa duna delfinnan e espacio y no molestia nan, pa salvarguardia nan sobrevivencia, y Aruba su bunita herencia unico.
