Deficit di Banco Central y Gobierno ta totalmente diferente: 17.7 vs 130.5 miyon florin!

Ta parce cu Banco Central di Aruba y Gobierno no ta riba e mesun liña of ta manehando cifranan diferente ora ta trata e situacion financiero di nos pais. Por lo menos cifranan cu Gobierno y CFT ta manehando y ta publicando ta totalmente diferente na esunnan emiti pa Banco Central. Pa comunidad, ta reina awor e pregunta, ta cua di e cifranan aki ta veridico y cua di nan nos por confia?

ADV

Banco Central a publica e ultimo cifranan di e situacion financiero di pais Aruba siman pasa, esta dialuna dia 29 di April 2019. E publicacion aki di Banco Central, ta mustra un reduccion substancial di crecemento di e debe (deficit) di Gobierno pa aña 2018. Segun e publicacion, Statistical Tables Government Sector Fourth Quarter 2018, den aña 2018 e gastonan di Gobierno tabata 17.7 miyon florin mas halto cu su entradanan mientras cu e deficit aki tabata 150.7 miyon florin den 2017. Esaki ta representa un reduccion substancial den e crecemento di debe den 2018 compara cu 2017 di 140 miyon florin. E cifranan aki ta totalmente diferente cu e cifranan cu Gobierno mes a publica. Den publicacionnan di Gobierno y CFT, ta menciona un deficit hopi mas halto, esta di 130,5 miyon florin pa aña 2018.

Den pasado, pa ta exacto na aña 2015, tambe tabatin diferencianan grandi entre e cifranan di Banco Central y di Gobierno, e biaha ey sinembargo e diferencianan no tabata na fabor di Gobierno y ta corda cu Minister di Finanzas di e tempo ey tabatin un disputa abierto cu Banco Central riba e cifranan presenta. E biaha ey e diferencianan tabata entre otro relata na un ley pa absolve debenan di Gobierno na SVB.

No ta conoci kico ta motibo di e diferencia e biaha aki, ni si ta e cifranan di Banco Central of ta esunnan di Gobierno di Aruba ta cuadra. Nos ta spera cu Banco Central y Gobierno di Aruba por clarifica e diferencianan aki mas pronto posibel pa asina comunidad ta na altura di e desaroyo real di e finanzas publico di Aruba.

Si e cifranan ta manera cu Banco Central ta mustra, ta parce cu Gobierno lo por a cumpli cu e normanan financiero hancra den e acuerdo cera entre Hulanda y Aruba di e gobernacion anterior. Sigur si tene cuenta cu e otro partinan cu ta conta pa e mesun norma financiero aki, manera AZV, SVB, ATA, Universidad di Aruba, Serlimar y SEPB hunto lo tin un surplus segun e cifranan cu Gobierno a presenta.

Por mira e cifranan di Banco Central aki: https://www.cbaruba.org/cba/readBlob.do?id=5398

Por mira esun cu Gobierno a presenta na CFT aki: https://www.overheid.aw/document.php?m=5&fileid=51562&f=b37bbb2289e934862886669595f32eab&attachment=0&c=30106

Y e evaluacion di e cifranan door di CFT por mira aki: http://www.cft.cw/jdownloads/All%20downloads/Adviezen/Aruba/cft_201900020_reactie_op_de_vierde_uitvoeringsrapportage_2018_aruba.pdf

Comments

comments