Pa casi 5 ora largo abogadonan mr. Vaders y Iles a hiba un defensa unda a mustra cu henter e investigacion contra Paul Croes tabata un “fishing expedition” y cu nan tabata simplemente tabata asumi cierto cosnan of saca nan conclusion, no basa riba prueba, pa yega na e acusacionnan cu nan a trece dilanti.
Por ehempel, ora cu ta tira un inval ta detene e persona di biaha, normalmente, pero no den e caso di Paul Croes. Ta manera cu nan tabata busca informacion pa kim’e, asina su Abogadonan a bisa.
Asina a bini un di dos inval, y despues di esaki su cliente ta wordo deteni. Y e forma con esaki a sosode, OM no a tene piedad, dilanti su yiunan, siendo cu el a ofrece pa medio di su Abogado pa presenta na Warda y e wordo deteni.
OM a bay cu tur documento financiero y a keda te dia di awe cu practicamente tur documento, strobando e defensa pa por haci nan defensa riba e aspecto financiero di e forma mas corecto.
OM a bay publico y a condene, siendo cu ainda no por a detene pa motibo cu mester a haci inval pa trata di haya algo incriminatorio cu nan no a logra haya cu tur e detencionnan cu a wordo haci te na e momentonan ey.
Ta detene Melony Paesch y acuse di labamento di placa, pero no tin ningun declaracion contra dje di un di e acusadonan of un otro testigo. Tur cos ta basa riba un informante di CID, kende a bisa OM cu e placa ta wordo laba via di e negoshi di tela.
A cuestiona cu nan a come of a paga cierto cosnan den forma cash y esaki no a wordo saca for di bancomatico of creditcard. A base di esaki OM a conclui cu ta trata di placa ricibi cash pa ontheffing, pero no ta bisa cual suma a wordo ricibi for di ken. “OM a haci un optelsom y loke no a worda paga via creditcard of bancomatico ta conclui cu e mester ta labamento di placa haya di ontheffing cu a wordo firma. Pero OM no a tene cuenta cu placa cash cu nan a haya of ta di: regalo di casamento; resto di campaña, ganamento di catochi (no lotto); herencia chikito; benta di nan cachonan di raza: trabou cu Paesch ta haci pa su mama pa trahamento costuum y pagonan cu Paul ta haya cash ora e uza su creditcard pa paga cuenta di consumo cu amigo. P’esey no por papia di labamento di placa pero cash cu ta facilmente splica y no ta bini di un delito,” e Abogado a bisa.
Pa loke ta e persona cu nan ta bisa tabata ilegal, e persona niun momento tabata ilegal na Aruba, segun Abogado Iles. E persona a drenta legal cu tur su documentonan, manera hefe di Inmirgacion a declara. No tabatin un contract firma entre e pareha y e señora Venezolano. Despues cu a conclui cu nan ta interesa pa tuma su servicio, a pidi prolongacion, mientras cu ta sperando su ultimo documento yega di Venezuela. No por papia di mensenhandel tampoco. Un salario minimo pa un persona interno ta 798,35 florin y nan a palabra di pague 1000 florin. Di otro banda, e maneho di e tempo ey tabata permiti e persona keda Aruba en espera di su peticion, si e cas unda e ta bay traha ta muchanan menor di edad.
Diamars awor e parti di Paul Croes y Melony Croes Paesch lo sigui cu repliek y dupliek pa despues e chens di ultimo palabra.
