Defensa den caso Diamanta ta sigur di a mustra cu no tin nada contra Howell y van Putten

Diabierna mainta a toca turno na defensa di e acusadonan Alan Howell y Jacky van Putten pa hiba palabra den corte, tratando di contradeci tur e ponencianan cu Ministerio Publico a trece dilanti den e caso Diamanta. 

El a conclui cu Ministerio Publico no por a proba malversacion, desfalco y tampoco falsificacion. Defensa a mustra riba rapport di e accountantnan cu a logra “match” tur e placa cu Howell a haya na e facturanan cu tin disponibel. Tampoco por papia di falsificacion pasobra e propio Farrah Boekhoudt di E Arubiano a reconoce e 19 facturanan como esunnan cu el a traha y tampoco a saca afo cu Howell a pidi e pa adapta e facturanan.

Den e caso di e acusado van Putten, su abogado a splica e circunstancianan bou di cual su cliente a tuma e funcion den un fundacion politico. E abogado a mustra riba e echo cu e fundacion aki e tesorero tin un otro rol. E no tin e autoridad final, sino e parlamentarionan cu ta esunnan cu ta haya e fondo di parlamento pa nan funciona. El a conclui cu mester declara su cliente liber pero si corte tin un otro opinion, el a trece e punto di stress cu e caso aki a causa riba su cliente y cu rapport di psycholoog ta mustra e efecto cu e ta sinti ainda. Pa esaki e ta pidi e ora pa no dun’e un castigo di prizon.

Dia 24 di maart tin sentencia den e caso aki.