Awe Corte den Prome Instancia a dicta sentencia den e caso di “ontneming” cu Ministerio Publico a cuminsa contra e sospechoso Oslin “Benny” Sevinger den investigacion Avestrus. Hues a bay de acuerdo e confiscacion di alrededor di 840.000 florin.
Anteriormente Sevinger tabata condena pa Hof den apelacion, pa un castigo di prizon di 48 luna, di cual 12 luna ta condicional cu un tempo di prueba di 3 aña. Hues a dicidi ademas cu el a perde e derecho di participa n’e eleccionnan y e derecho pa ocupa cualkier cargo publico pa un periodo di 5 aña di tempo.
Relaciona cu e condena cu Sevinger a haya, Ministerio Publico a entrega un peticion pa kita rond di 900.000 florin di e sospechoso. E mayoria di e suma aki ta consisti di rikesa inexplicabel cu S. a dispone di dje. Otro parti ta trata di e donacionnan cu S. supuestamente a ricibi directamente relaciona cu actonan castigabel pa ley.
E caso Avestrus ta encera acusacion grave contra e ministro de Infrastructura anterior y trece gran impacto social cu ne. Cu e “ontneming” aki e suma di 840.000 florin lo bolbe bek pa Pais Aruba.
