Decision a cay: Paso pa Futuro ta keda e aña’ki na su edificio

Awe den oranan di atardi mayornan di studiantenan di Scol Paso Pa Futuro a yega John F Kennedy Educational Centre pa mustra nan malcontento cu e forma di maneho di Minister di Enseñansa Rudy Lampe. Mas pa e forma cu nan ta sinti nan mes intimida pa bay di acuerdo cu e mudansa di e scol aki.

Mayornan a dicidi di entrega un Manifiesto na Minister Lampe den cual nan ta expresa pakico ta importante pa nan yiunan keda den e edificio patras di Postkantoor na Playa, un facilidad adapta specialmente na necesidad di e muchanan aki.

E demostracion tabata domina pa e mayornan, pero docentenan tambe tabata presente.

A yega cu borchi cu ta mustra nan malcontento cu e situacion cu no por logra yega na un trankilidad na e scol Paso Pa Futuro. E ta un problema cu nan a bin ta atendiendo pa basta luna. Ta parce cu esaki ta un di e problemanan di 2021 cu no ta logra yega na un solucion.

Un vocero di mayornan a expresa cu nan a kere cu a yega caba na un solucion di e problema aki. Mas ainda cu a hay’e por escrito y ta parce awo cu e carta tabata solamente pa calma nan temporalmente y aworaki e plannan di mudansa ta sigui. Nan ta pidi un splicacion di con e plan ta sigui y di con no ta scucha nan.

Josephin Albertus den comentario na final cu nan no ta muda tanten cu esaki ta nifica un mehoracion. Ta para riba cu nan kier un enseñansa di calidad. E Minister durante e reunion a sigui, a bisa finalmente cu e scol ta keda y na final di aña 2020 / 2021 ta evalua si nan ta muda. “Si no tin nada miho, nos no ta muda,” Albertus a expresa.

A bisa e mandatario tambe pa bay e scol, sinta den e klasnan pa mira con e maneho ta y despues por sinta papia di un cambio of no.  SI mester muda e espacio di e muchanan por ta menos cu 70M2.

Tambe nan a condena cu mayornan ta hayando yamada of email puntrando mayornan si di berdad kier pa nan yiu, keda un aña pasa. Riba e punto aki no a yega na un acuerdo.
Pa loke ta e di tres punto, a cambia e director y suplente, y awo diripiente a bini cu un manager. Esaki a tuma luga sin e debido transparencia, entre otro di un solicitud habri. “No ta pa pret nos ta aki. E muchanan mester di trankilidad y enseñansa cu calidad.” Pues pa e ultimo dos puntonan mester keda den dialogo cu Minister.