Debate den corte: UTV y ATV no pero Jeep si ta bonbini den Parke Arikok

Dia 31 di juli awo Corte ta dicidi den e caso cu Aruba Offroad Foundation a cuminsa contra Parke Nacional Aruba, y Pais Aruba.

AOF ta sinti cu e decision tuma pa PNA ta perhudica nan inmensamente introduciendo e prohibicion pa ATV y UTV drenta e parke, entrante prome di juni. Aunke a duna nan un periodo di gracia te cu october. Abogadonan Reinkemeyer y mr. Ruiz a bay ampliamento pa mustra loke nan ta bisa ta inconsistencia den e decision tuma door di PNA.

A cuestiona cu niun momento a envolvi nan na momento di creacion di e maneho nobo aki, a base di kico a yega na e decision y di con ta UTV y ATV so ta prohibi pa drenta. Jeepnan lo por sigui pasa normal den Parke.

Abogado a mustra cu nan kier a sinta na mesa cu Parke, pa yega na solucion pa motibo cu ta papia aki di mas 20 compania empleando directamente y indirectamente rond di 600 persona.

Aruba Offroad Foundation den Corte contra Parke Nacional Arikok

Aruba Offroad Foundation den Corte contra Parke Nacional Arikok. Click link pa mas https://24ora.news/32AvqFj

Posted by 24ora on Friday, July 17, 2020

P’esey tabata a mustra disponibilidad pa cambia e tirenan di UTV y ATV pa esnan mescos cu esnan di Jeep, pero no a reacciona. A ofrece pa participa den curso con pa maneho e vehiculonan aki den Parke, evita molester di parhanan, baha zonido di e vehiculo, y a conseha pa pone regla cu si viola esaki ta haya castiga. Pero nada di loke nan a bisa a wordo acepta.

Ademas, huur di e vehiculonan aki ta hopi popular bou turistanan y awor por ehempel, segun e abogado, tin reservacion haci pa aki dos aña caba di turistanan crucero.

Pais Aruba y Aruba Birdlife Conservation a wordo representa den e caso aki pa mr. Rep, mientras cu PNA tabata representa pa mr. Arendsz Marchena.

El a trece dilanti cu a base di estudionan cientifico haci riba e efectonan di e vehiculonan aki riba e Flora y Fauna, a dicidi di crea un maneho di locual ta permisibel y kico no. A anuncia e maneho aki na juni, 2020, basa riba investigacionnan haci y maneho di pais Aruba manera poni den e ROP y concept ROPV. Exponiendo naturalesa na e vehiculonan aki lo causa hopi daño, tabata conclusion di e estudionan.

A bisa tambe cu no mester lubida, cu Aruba a ratifica cierto tratadonan internacional pa proteccion di naturalesa y ta a base di esaki a crea un maneho nobo di naturalesa. No mester lubida cu Parke ta un di e areanan di proteccion mas importante di e isla.

Di un rapport cu PNA a laga traha riba e vehiculonan menciona den Parke, a sali afo cu e stof fini cu nan ta lanta ta bay directamente riba e matanan y ta forma un capa diki cu transcurso di tempo. Y esnan cu no ta afecta, door cu e vehiculonan no ta yega cerca di nan, ta keda den bon estado.

E zonido y trilling di e vehiculonan tambe ta causa cu animalnan ta bandona nan habitat, y ta bay en busca di otro luga. Durante e periodo cu Parke ta cera, den cuadro di Covid-19, por a nota cu hopi a bolbe nan habitat.

E tabata un caso larguisimo cu a finalisa rond di 5.30 di atardi y Corte lo anuncia su decision dia 31 di juli.