Deaxo Croes y team a yega Boneiro pa e hazaña di ‘Crossing for Prevention’

Diaranson mainta trempan a sali un grupo di boto for di Aruba pa asina nabega pa Boneiro. Esaki ta relaciona cu e meta di Deaxo Croes pa landa for di Boneiro pa Corsou. E condicion di lama no tabata esun di mas miho awe mainta.

Esaki a haci cu e trayectoria a dura aproximadamente ocho ora. Algun boto tambe a haya poco contratiempo minimo cu e.o. motor. Asina mes, e botonan a logra yega y a mara na The Harbour Village Marina.

 Diahuebs lo tin riba programa varios actividad pa Deaxo manera e.o. rueda di prensa, topa y landa cu algun landado di Boneiro. Tambe lo tin un landamento ful rond di Klein Boneire. Na final di dia, 24ora.com lo tene un entrevista extenso tambe cu Deaxo. Diabierna lo ta un dia di descanso pa Deaxo y un dia pa e team prepara e ultimo detayenan.

E hazaña pa landa mes, lo ta saliendo pa 2:00 am (marduga) cu destino Corsou. Ta premira cu esaki lo dura entre 10 pa 14 ora. Team di 24ora.com lo tey abordo di e boto Kayla pa asina capta tur imagen. 

Un danki na Aruba Bank N.V., BITE Communications, Gomez Coffie CR38TE ,SUM BUM , Central Hotel Bonaire y Kayla pa haci e cobertura aki posibel.