Bon noticia pa tur esnan cu no a haya chens ainda pa entrega nan diseño pa NAGICO su Carnival Art Contest; e deadline a wordo extende te cu 4 di december. Den e concurso aki, hobenan entre edad di 13 pa 20 aña tin e oportunidad pa demostra nan talento cu un obra di arte inspira door di nos dushi musica di carnaval.
Pa stimula nos artistanan hoben, entre otro, NAGICO a organisa un tayer bou di guia di artista Vanessa Paulina luna pasa y awor Galleria Baz-RRR ta habri su portanan pa yuda esnan cu no a tribi ainda. Bazz-RRR ta invita un y tur pa uza nan facilidadnan y material completamente gratis, pa asina tur hoben di Aruba por crea un obra original pa nan chens di gana 2 pasashi ida y buelta pa Miami y un estadia di 5 dia y un tour den e famoso districto di arte Wynwood.
Con por participa?
Galleria Baz-RRR ta situa
na comienso di caya grandi. Tur hoben ta bon bini riba diasabra 30 di november
di 10or di mainta pa 5or di atardi y dialuna 2 di december di 2or te cu 6or di
atardi. Esnan cu no ke haci uzo di e facilidadnan di Baz-RRR y cu ta trahando riba
nan obra caba, tambe por entrega esaki ainda. E
formulario di inscripcion
ta disponibel riba pagina di Facebook: NAGICOInsurancesAruba. Por entrega obra te cu 4
di december, 5or di atardi, sea na Galleria Baz-RRR of na oficina di
NAGICO na Dakota.
Mas tocante NAGICO Carnaval Art Contest
Cada participante tin cu entrega un diseño cu e tema ‘Musica’. Algun di e reglanan ta cu e diseño crea mester ta den forma abstracto y atractivo pa tur generacion. Por haci uzo di ‘mixed media’ pa presenta e creacion. Naturalmente e diseño mester ta uno unico, crea specialmente pa e competencia. Esencial tambe ta cu e mester inclui e icono di NAGICO su logo, esta e paraplu, den color blanco, berde of geel. E diseño ganador lo ta e inspiracion pa NAGICO su diseño di carnaval cu lo wordo instala riba trailer di differente banda musical, cual lo duna e hoben talentoso aki reconocimiento y fama.
Mas informacion? Bishita e pagina di Facebook ‘NAGICOInsurancesAruba’ of tuma contacto cu NAGICO via 588-7000.
