De Vries: buskeda di weso tabata un fout grandi

Riba propio iniciativa, busca e wesonan di Natalee Holloway, sin envolve polis y husticia, ta un fout grandi, segun e periodista Peter R. de Vries.
“El a strañami con esaki a bay, esaki por trece daño grandi na e investigacion,” segun de Vries. E tabata haciendo pa basta tempo investigacion riba e desaparicion di Holloway. E periodista a mustra cu destruccion di rastro por tuma luga, si hendenan cu no ta experto bay cobra. De Vries ta compronde tampoco dicon un investigacion di DNA ta dura un luna.

“Dicon e mester dura asina hopi?”
E tata, Dave Holloway a laga sa diaranson, cu e, cu ayudo di e detective priva TJ Ward, posiblemente lo tabata tin un break den e caso cu ta trata di hayasgo di restonan humano na Aruba.
Mientras tanto Ministerio Publico ya caba a indica cu e restonan haya, no ta di origen humano. Segun e relato cu Ministerio Publico a publica, e investigacion aki a wordo haci e aña aki y cu durante e investigacion aki di Polis den un area cu señor Holloway a indica den e informacion cu el a entrega, no a wordo haya restonan di wesonan humano.
Aparentamente na e momento aki, atrobe informacion a wordo publica pa of den nomber di señor Holloway tocante resultadonan di un investigacion haci na Aruba. Sinembargo,
actualmente no ta conoci na Ministerio Publico of na Polis, hechonan nobo of circumstancianan nobo relaciona cu hayazgonan di weso, cu a wordo investiga of mester wordo investiga.