De Veer cerca Gobernador awe

Awe mainta durante entrenamiento militar rond di edificio di Parlamento, relaciona cu apertura di aña Parlamentario nobo mañan, nos a topa cu Eduardo de Veer, su yiu Eddie de Veer y Rik Timmer drentando oficina di Gobernador, Alfonso Boekhoudt. Na nan salida nos a purba puntra Eduardo de Veer riba su bishita, pero el a prefera di no duna comentario riba nan combersacion cu Gobernador Boekhoudt. “Mi lo contact Bo despues”, asina e comerciante cu awendia ta Presidente Comisario di MetaCorp, a bisa cu un cara bastante serio.

Pero deSin oranan di atardi, ora cu empleadonan a comparti un carta cu nan a haya awe di MetaCorp, anto por conclui cu probablemente e reunion awe mainta tin di haber cu e situacion critico cu e compania mas bieu di Aruba ta pasando aden. For di momento cu a cuminsa cu negoshi di cine, sigui pa negoshi di refresco, transporte, y den e ultimo decadanan a inverti miyones den un planta pa procesa, separa y recicla desperdicio.

Di un dia pa otro Minister Otmar Oduber, Xiomara Maduro y Andin Bikker a manda un proposicion di ley pa pasa dia 23 di september proximo den Parlamento, den cual di forma delibera, Gobierno ta duna Serlimar monopolio riba maneho di desperdicio riba nos isla, cu lo costa pan di mas di 100 trahado na EcoTech y EcoGas. Y riba dje Minister Xiomara Maduro ta cla pa introduci un otro ley pa bin cu un belasting special riba refresco, e asina yama “Sugar Tax”, aunke cu lo cobra e mesun accijns aki riba refresco cu sucu y esunnan sin sucu tambe! E ley ey lo perhudica Tropical Bottling Company, unda ta emplea mas o menos 160 trahado.

Cu Eduardo de Veer a opta pa bay bishita Gobernador awe, ta mas cu cla kico lo ta e contenido di e reunion, lo ta pa pone e maximo mandatario na altura di e acontecimientonan y con Gobierno ta haci un atentado directo contra companianan netamente Arubiano. Den un pais democratico cu conoce “Free Enterprize”, awe nos ta bibando momentonan historico con Gobierno ta pasa ley pa perhudica negoshinan, persigui comerciantenan cu a sa di inverti pa e ultimo 100 añanan den nos economia y con Gobierno den forma delibera ta opta pa laga centenares di trahado riba caya sin pan riba mesa.

E pechi cu Eduardo de Veer a bisti awe ta papia mil palabra….e imagen di MetaCorp di 100 aña cu probablemente e compania no lo alcansa, si e Gobierno aki sigui cu su plannan pa caba cu EcoTech, EcoGas y Tropical Bottling Company.