DCA a ground avion di Aruba Airlines

Desde ayera Departamento di Aviacion Civil (DCA) a “ground” un avion di Aruba Airlines. E motibo no ta mucho bon conoci, aunke tin hende ta bisa cu ta un “birdstrike” tabatin, esey no ta confirma. Hecho ta cu e avion tin un dobla chikito den e hala banda drechi. No tin informacion unda el a pasa. Mientrastanto cu e avion no tin permiso pa bula, e aerolinea ta confronta “delay” na Corsou, specialmente di pasaheronan di Aruba cu no por yega cas for di ayera caba. Probablemente DCA ta sperando pa drecha e hala di avion prome cu e por “clear” e avion pa realisa vuelo comercial. Lamentablemente ni DCA ni Aruba Airlines mes no a sali informa pasaheronan y pueblo di Aruba di nan decision pa prohibi e avion di lanta vuelo for di Aeropuerto di Aruba.