Awe mainta, riba e promé dia di e konferensa anual di CANSO Latin America & Caribbean Conference/LAC III na Curaçao Renaissance Resort & Casino, e kompania Merikano AERION huntu ku DC-ANSP a implementá pa e espasio aéreo di Kòrsou e asina yamá ‘space based ADS-B’ (Automatic Dependent Surveillance-Broadcast). Esaki ta un teknlogia super moderno i inovativo ku ta risibí datonan (velosidat, posishon, altura, etc.) ku e ekipo di ADS-B na bordo di avionnan ta transmití kada mei sekònde pa satélitnan ku ta manda esaki atrobe atraves di e stashonnan na tera di AIREON pa e sentronan di kontròl aéreo, manera esun di DC-ANSP na Seru Mahuma.

Na e okashon aki direktora Micilia Albertus-Verboom di DC-ANSP orguyosamente a anunsiá ku djabièrnè último nan tambe a implementá e teknologia avansá aki pa por duna un servisio ainda mas sigur i efisiente na usuarionan di e espasio aéreo di Kòrsou. Señor Cyriel Kronenburg, vise presidente Aviation Services di AERION, a splika ku e meta prinsipal di e ‘space based ADS-B’ ta pa por brinda e servisio di kontròl aéreo mas sigur i efisiente i ku mas kapasidat den espasionan mas alehá ku e radar konvenshonal na tera no ta kubri. Den e parti nort-wèst di e área di Kòrsou no tin kubertura di radar i aya tabata duna servisio prosedural. DC-ANSP ta e promé den e region aki di Karibe i Latino Amérika ku tin e teknologia nobo aki.

Riba e promé dia di CANSO LAC III tabatin tambe un tayer kaminda a demostrá funshonamentu di e teknologia i su diferente bentahanan grandi pa aviashon. E teknologia awor ta operashonal rònt mundu i AERION ta ofresé esaki awor na (potensial) usuarionan globalmente.

Comments

comments