Sindicato di Bomberonan (SINBA) a logra haya un reunion cu comisión di siguridad di Parlamento, relaciona cu tur e preocupacionnan cu e Bomberonan tin pa cu nan funcionamento. Por corda ainda e famoso expresa cu mester spuit pifpaf den e motor pa e vehiculo di paga candela por start.
Davni Roza a resumi cu e problemanan di e cuerpo ta e vehiculonan, tiki y den mal condición, falta e paña pa bisti ora di candela y tambe e aparatonan (tankinan), ya cu esnan actual ta hopi bieu. Pero tambe a papia di e crashtruck di aeropuerto c uta laga hopi di desea. “Nos a papia di e maneho completo pa cu Brandweer,” Roza a splica.
Parlamentarionan a bisa e delegacion cu nan ta bay haci nan esfuerzo pa aloca e fondonan necesario pa compra di dos vehiculo di paga candela.
SINBA ta den un taskforce di Gobierno cu ta trahando riba e plan di e vehiculonan cu mestedr drecha y e postnan tambe; pero tambe e aparatonan pa paga candela. E preocupacionnan di SINBA ta hopi pasobra nan vehiculonan no ta ni gekeur, no tin uniform, ni sapato, hopi promocion tranca pa añanan largo. Disgusto pasobra un grupo nan promocion a keda regla y otronan no.
SINBA su miembronan tin nan posicion pa loke ta e suma cu mester entrega y a entrega esaki na Prome Minister. Nan ta di opinion cu nan no por bay contra e pueblo cu ta esun cu ta paga nan. Pa loke ta indexering, den e situacion cu Aruba ta pasando aden por papia, pero no por exigi cu e situacion di likides existente. Mester laga e situacion di pueblo mehora, pa despues bay riba e punto ey. “Si e pueblo cu ta pagami no ta bon, anto ami tampoco por ta bon,” el a duna di conoce.
