Diasabra awo, 6 di juni, ta tuma luga e pago di bijstand pa luna juni. Den e ultimo 2 lunanan a haci cambionan, p’esey e luna aki un biaha mas tin cambio. E cambionan aki ta di e 3 districtonan mas grandi cu ta Post Kantoor San Nicolas, Post Kantoor Playa y MFA Savaneta.
E 3 localidadnan aki lo cobra dia 6 di juni desde 8:00AM te cu 12:00PM, di fam A te cu K. Desde 1:00PM te cu 5:00PM fam L te Z lo cobra. Jesseline Soto-Garcia-Kelly, vocero di Departamento di Asuntonan Social (DAS), a bisa cu a split e grupo den dos y esaki ta solamente p’e 3 localidadnan grandi. Na e 3 localidadnan tin mas hende cu ta cobra y door di evita aglomeracion di hopi hende, a split esaki den 2.
Pa loke ta trata e localidadnan di MFA St. Cruz, MFA Paradera y MFA Noord, e cobransa ta continua normal parti mainta di 8:00AM pa 12:00PM. DAS ta pone enfasis di evita bay cu mucha, hendenan grandi ta haya prioridad, si ta malo na hospital pa tuma contacto cu e trahado social di hospital p’asina regla e bijstand na tempo, si e cobrado mes no por cobra pa un motibo of otro di salud por autorisa un otro persona pa cobra p’e pero mester acudi na DAS cu identificacion valido pa regla esaki na tempo.
Riba e lista nan tin 683 persona cobrando na Post Kantoor Oranjestad, 536 na Post Kantoor San Nicolas, 491 na MFA Savaneta, na MFA Noord ta 392, MFA St. Cruz ta 375 y MFA Paradera ta 268. Un total di 2746 persona ta cobra diasabra awo nan bijstand. Cada Post Kantoor y MFA ta keda mantene e reglanan di normal nobo, unda cu un biaha mas DAS ta busca tentnan p’e luganan cu no ta ofrece sombra na e clientenan. Tambe na e momentonan aki tin mas di 900 peticion nobo pa bijstand cu ta den proceso, di cual e ta tuma su tempo door di ta mara na ley.
