Darlaine Guedez-Erasmus (MEP): Aruba na caminda pa conoce su Defensor di Pueblo

Dialuna 23 di januari, 2023 nos a trata den sala di Parlamento adaptacion di e ley Ombudsman (AB2020 no. 145) y cu a aproba. E adaptacion ta pa entre otro nombramento y despedida di e Ombudsman y Kinderombudsman.

Un adaptacion importante den e ley di Ombudsman ta articulo 2. A agrega den e articulo aki cu lo bin cu un area adicional di interes p’e Ombudsman/Kinderombudsman. Esaki ta encera cu lo bay realisa e investigacionnan cu ta destina pa promove e igualdad di oportunidad pa nos mucha- y hobennan.

Manera crioyomente yama, “E Defensor di Pueblo” tin un tarea hopi importante den nos comunidad. Pueblo por acudi cerca dje, pa ricibi e atencion, informacion pa su preocupacion y sigur, e proteccion p’e y su famia. E Ombudsman ta un mediador entre pueblo y compania estatal y semi-estatal. E servicio di e Ombudsman ta gratis y esaki ta haci tambe cu tur hende por acudi cerca dje. Sin mira e status social of edad di e persona. Di e forma aki tur hende ta haya e oportunidad cual ta uno husto.

Na momento cu Parlamento di Aruba a aproba e ley di Ombudsman cu e adaptacionnan presenta, esaki lo bira un realidad y lo por cuminsa cu e proceso di ehecucion di e instituto importante aki. E institucion Ombudsman sigur lo haci diferencia grandi den bida di cada un persona cu ta biba na Aruba. Como Parlamentario mi ta sumamente contento cu manera otro paisnan den reino awo si Aruba lo cera conoci cu su Defensor di pueblo.