Darlaine Erasmus (MEP) na cabes di comision fiho pa cuido di e grandinan

Pa prome biaha ta decreta luna di october 2021 como luna di Adultonan Mayor/60+. Aruba lo celebra esaki durante henter luna. Na Aruba tin 25 mil adulto mayor y hopi bes ta e grupo aki ta esun mas vulnerabel den nos comunidad, por ehempel door di soledad, problema fisico y mayoria persona cu a fayece durante COVID ta adulto mayor. E meta di e luna aki ta pa pone extra atencion na nos adultonan mayor. Riba nan retonan di bida, loke ta bayendo bon y iniciativa nobo basa riba nan bienestar. Y tambe pa asina pueblo completo por demostra con hopi nos ta aprecia nos 60+.   

Ta importante pa informa pueblo cu tin un schedule disponibel cu diferente actividadnan durante luna di october. E actividadnan aki ta encera brinda informacion, actividadnan recreacional, momentonan di haci pregunta y tur esakinan ta wordo organisa pa diferente instancia y fundacionan. Parlamentario Guedez-Erasmus ta menciona cu e ta hopi contento cu a decretal luna di october como luna di Adulto Mayor paso e ta di opinion cu hopi bes nos ta lubida riba nos grandinan.

Bisando esaki Parlamentario Guedez-Erasmus ta menciona cu su persona lo presidi e comision fiho di Cuido di nos grandinan den Parlamento. E ta sinti cu esaki sigur ta un oportunidad pa traha duro pa asina garantisa un mihor calidad di bida pa nos adulto mayornan, pa medio di leynan cu ta na nan bienestar tambe.  

“Mi kier felicita tur Adulto mayor cu nan luna special y gradici nan pa ta esnan cu a yuda construi nos Aruba/nos pais. Danki gobierno di Aruba y instancianan/fundacionnan cu a haci esaki posibel. Ban celebra e luna aki engrande y ban sigui balora nos adulto mayor!” parlamentario Guedez-Erasmus ta termina bisando.D