Daphne Lejuez: Tin cu tuma un decision cu pueblo no tin di sufri hopi di dje

1826

Minister President a presenta na Parlamento pa un reunion publico (openbare bijeenkomst) y a pidi reaccion di tur fraccion y miembro independiente pa loke ta e resultado di e negociacion te cu diahuebs, 13 di augustus. Parlamentario Independiente a manda su reaccion e mesun dia por escrito por medio di Parlamento.

Den e presentacion, Minister President a duna Parlamentarionan un update di e status di e negociacion, pa cual el a manda un carta y documentacion e dia anterior. Basa riba esaki el a pidi reaccion, pregunta y standpunt di miembronan di Parlamento.

Locual ta remarcabel for di e documentacion y splicacion ricibi ta cu no tin mucho espacio mas pa cambio, pero tampoco mucho tempo mas pa sigui warda. E recursonan financiero di Aruba ta limita y den un termino hopi cortico lo no por sigui paga FASE, loonsubsidie di MKB regeling, ni gobierno lo por sigui cubri su responsabilidadnan financiero. A base di esaki, Parlamentario Independiente Daphne Lejuez a haci e siguiente preguntanan:

1. Kico ta e posibilidad realisticamente pa ainda trece cambio na e ultimo version di e landspakket cu a keda manda pa Staten diaranson?

2. Ta existi e posibilidad pa no bay di acuerdo cu cierto punto den e landspakket of rijkswet pero toch logra ricibi e tercer tranche di fiansa?

3. Kico ta e standpunt y conseho di Gobierno mes na e momentonan aki cu e condicionan presenta? Bay di acuerdo, of no?

Daphne Lejuez: Tin cu tuma un decision cu pueblo no tin di sufri hopi di dje

Daphne Lejuez: Tin cu tuma un decision cu pueblo no tin di sufri hopi di djeClick link pa mas: https://24ora.news/3av5xIW

Posted by 24ora on Friday, August 14, 2020

4. Kico ta e ultimo fecha na e momentonan aki na unda ainda lo por paga FASE, loonsubsidie y MKB regeling?

5. Kico ta e ultimo fecha na e momentonan aki na unda gobierno por cumpli cu tur su responsabilidadnan financiero? Den ki secuencia y cu ki prioridad lo haci pagonan den caso cu fondonan financiero di Gobierno no ta suficiente?

6. Gobierno lo por comparti cu Staten e ultimo version di e dos Rijkswet (Raft y OHH) cu ta den negociacion?

7. Gobierno a pidi Raad van advies pa conseho tocante e Rijkswetten y Landspakket dia 16 di juli y a ricibi un contesta di Raad van Advies dia 24 di juli (”Advies ex. Artikel 17, onderdeel b, van de Landsverordening Raad van Advies, betreffende de ontwerp-Rijkswet Caribisch orgaan voor hervorming en herstel, ontwerp-Rijkswet Aruba financieel toezicht, en het ‘landspakket’ (onderlinge regeling) Kenmerk: RvA 97-20”) Gobierno lo por comparti un copia di e conseho aki cu Staten?

Pa locual ta trata su punto di bista den Lejuez su rol como representante di Pueblo, primeramente mester mira e comunidad, e situacion actual, y kico e alternativanan realistico lo ta cu of sin ayudo financiero di Hulanda. Mester tene cuenta cu e consecuencia socio-economico di Aruba si keda pospone pa tuma un decision y mester duna oido na stakeholders.

E ta obvio pa cualkier persona cu e forma y momento cu e condicionnan di Hulanda presenta no merece niun elogio. “Pero esey no kiermen cu nos no mester keda realistico y honesto cu nos mes. Tin rason y keda insisti, mientras cu nos bisiña ta perde su trabou y no por alimenta y cuida su famia pasobra e compania na cual e ta traha mester a bati bancarota pa falta di ayudo financiero cu nos ta ricibi di Hulanda, segun mi no ta sirbi e interes general di nos poblacion,” el a bisa.

Lejuez kier urgi gobierno pa tuma un decision a corto plaso. Un decision den cual e ciudadano ta sufri lo menos posibel e consecuencia adicional negativo financiero y social, unda e Pais por reanuda e debate cu Hulanda riba e posicion estatal na un otro momento den futuro cercano. Na final di dia, ta papia aki di un proposicion cu un duracion di 6 aña bou cual no lo haci niun cambio na Aruba su Statuut, pero si na e interpretacion di su contenido, y esaki siguramente mester resolve.

Pero na e momento aki Lejuez ta mira su co-ciudadanonan y nan famia prome, su prohimo y con nan lo mester surpasa e crisis aki. “Esey ta locual tin mi atencion na e momentonan aki, pasobra sin nan capacidad di contribui lo no tin posibilidad pa restaura nos Pais,” segun e Parlamentario Independiente.