Daphne Lejuez: Ta ora pa reevalua pakete di medidanan?

Kisas e ta un oportunidad perfecto pa Aruba renegocia su posicion financiero y pidi pa reduci interes di su compromisonan financiero? Of hasta pa un periodo determina unicamente paga interes te cu e situacion stabilisa? Esaki ta por lo menos dos pregunta cu Parlamentario independiente Daphne Lejuez a bisa awe riba su pagina di Facebook. E tambe ta siguiendo e ultimo desaroyonan di cerca rond di e Coronavirus.

Mientras cu ta preparando pa trata Presupuesto 2020 y Reforma Fiscal 2, considerando y evaluando e situacion actual y e panorama mundial pa loke ta COVID-19 (Coronavirus), probablemente Aruba lo mester tuma decisionnan drastico manera otro paisnan ya caba ta haciendo, manera por ehempel temporalmente cera frontera cu otro paisnan na cual e virus a keda constata te ora cu nan controla e brote di casonan eynan.

Esaki particularmente pa por purba mantene e cantidad di persona contagia na un minimo pa no mester “overload” e servicio medico y crea un situacion cu no por maneha. Na e momentonan aki por ehempel tin paisnan cu tin limitacion di ventilador (pa yuda esunnan cu tin complicacionnan respiratorio), pa motibo cu no ta fabricando mas di e mashinnan aki pasobra no tin e piesanan necesario cu ta bini por ehempel for di China. Pues tin un scarcedad di cierto producto di cuido mundialmente.

Pa por maneha y mantene e cantidad di infeccion na un minimo ta rekeri pa henter comunidad ta consciente y mantene nan mes na un regimen di precaucion (laba man, limita/evita biaha of ta den gruponan grandi, etc). Esaki lo por hiba na clausura di scolnan pa un temporada defini, pero sigur tambe por cuminsa pensa na trabounan cu por haci for di cas en bes di na oficina pa por limita posibel exposicion na e virus.

Tur esakinan lo por hiba na consecuencianan economico y financiero pa nos pais y sigur pa cada cuidadano na momento cu e no por traha, of cu no tin trabou pa motibo di falta di demanda y fluho di placa. Mirando esaki, algo cu ya ta sosodiendo rond mundo, hopi pais ta preparando pakete di alivio economico pa por sigura cu cuidadanonan por sigui biba y cumpli cu nan compromisonan financiero.

Mientras cu inicialmente Gobierno di Aruba a prepara un presupuesto basa riba un pakete di reforma fiscal (mas belasting) y mirando e situacion economico mundial y e pronostico economico di nos turismo y situacion financiero di nos pais – e lo no ta un bon momento pa pidi pa reduci nos interes pa loke ta e compromisonan financiero y tambe duna nos e espacio pa por desvia di e normanan palabra cu Hulanda te ora situacion mehora? Esaki acompaña pa un ehercicio di reduci gastonan y plannan cu no tin prioridad pa di e forma aki por crea fondo necesario pa por duna comunidad un alivio durante e crisis economico eminente?