Miembro di Parlamento Daphne Lejuez, cu durante e ultimo eleccion na 2017 a logra 196 voto, lo anuncia aki rato su retiro for di Fraccion di MEP. Cu esey e lo bira independiente den Parlamento, haciendo asina cu Fraccion di MEP ta baha for di 9 asiento pa 8 asiento. Awor aki mas cu nunca e coalicion ta importante, pasobra nan tin un mayoria minimo di 11 asiento.
E movecion politico aki ta haci e posicion di Ricardo Croes (RED) ainda mas fuerte y escencial pa cumpli cu su peticionnan, de lo contrario Gobierno lo cay.
Daphne Lejuez tabata Presidente di Camara di Comercio y despues a dicidi di afilia na partido MEP. Sinembargo, e hecho cu e ta critico y hopi bez pendiente di comercio y economia di nos pais, a haci cu den coalicion mes no ta gust’e mas. Specialmente pa e ley di Serlimar, el a ricibi hopi presion interno, den un esfuerso pa MEP por cumpli cu demanda di POR y Otmar Oduber. Cu e movecion aki, Lejuez ta mustra cu e ta para pa integridad y no pa interes politico di partido. Den comercio su popularidad a crece enormemente ultimo tempo!
Pa 3:30pm e Parlamentario independiente lo tene un conferencia di prensa pa e mes anuncia su salida di Fraccion di MEP. Claro cu 24ora.com lo tey bibo pa trece e noticia aki pa tur usuario. Keda pendiente!
