Mi a vocifera anteriormente di lo ta dispuesto di sostene e presupuesto si esaki ta financieramente responsabel. Mi ta consciente cu nos ta den un situacion hopi critico actualmente. Y aunke mi no ta sinti confortabel pa duna apoderacion den un solo tiro pa gobierno fia 1.3 Biyon florin, particularmente teniendo na cuenta:
- E falta di transparencia di parti gobierno pa loke trata e postnan den e presupuesto.
- E falta di transparencia di e rapportnan cu cifranan cu ta substancia e deficit nan cu AZV y SVb lo encontra
- Falta di un plan di alivio mas amplio pa dune e sosten necesario na nos economia/sector priva pa e por bons bek lo mas lihe posibel
- E conseho negativo riba e presupuesto original y e falta di conseho di Raad van Advies riba nota di cambio cu a presenta
- Y e falta di tempo un biaha mas cu Parlamento ta haña pa studia y trata e presupuesto, ja cu a ricibi e presupuesto 6 luna laat.
Apesar di tur esaki lo mi aproba e presupuesto aki, pasobra sin aprobacion esunnan cu a perde nan trabou of entrada lo no por haña ayudo.
Pero mi kier pa Pueblo sa cu mi lo keda monitor cada paso cu wordo tuma y e progreso di e presupuesto regularmente y ta spera cu gobierno lo sa di ta prudente y haci prestamo den fase, manera y unda cu ta necesario, despues di a implementa reduccion di gasto manera ta papia di dje cu lo kier introduci den fase 3, pasobra nos pueblo ta pasando den duro na e momentonan aki y e no ta wordo experiencia den fase.
Mi ta desea Gobierno hopi sabiduria den e temporada sumamente dificil aki y na Pueblo hopi forsa, compasion y comprension pa bo prohimo, nos tur ta den e situation aki hunto.
Tambe un danki di curason particularmente na e personal den sector di cuido y prevencion cu ta traha dia y anochi pa trata na contene e virus!
Por ultimo mi kier a enfatisa un bes mas pa tur hende keda cas y yuda limita contagio.
