Segun Daphne Lejuez, durante su disertacion den Parlamento diabierna, p’e ta bay mas tanto pa locual nos tin nos dilanti. Tin un mocion di desconfiansa contra Minister Marisol Lopez-Tromp, pa Parlamento sostene.
Na momento cu pidi Parlamento pa sostene un mocion di desconfiansa, ta nifica cu e minister mester a haci algo contra Parlamento. E lo mester a actua na un forma iresponsabel contra Parlamento. Pero te awor aki, esnan cu a pidi pa e mocion aki, no a duna ningun prueba dicon esaki a tuma luga. Tur loke a tende ta partido, minister, ministerraad.
Por a scucha diferente di e otro parlamentarionan ta papia na nomber di ministerraad y di minister, siendo cuno ta compronde den ki capacidad nan por haci esaki. Lejuez lo a spera e ora un carta di hunta di minister, cu ta indica esaki. E lo a spera e ministernan na Parlamento pa splica cu nan no por traha cu e minister aki.
Pero no un Parlamentario ta papia den nomber di un gobierno. Esey no ta corecto. Tambe ta sinti cu si en berdad Parlamento mester perde confiansa den e minister, e ora minister mester a uza tur su hermentnan na su disposicion, caminda por haci pregunta, un vragenuur, interpela e minister, yam’e den un comision fiho, prome yega na un decision.
Tin diferente hernet na disposicion parlamentario prome cu yega na e punto ey. E ora tin un base amplio. A haci tur e preguntanan y tin e prueba pa bo por yega na e posicion cu bo ta duna un mocion di desconfiansa como Parlamento.
Si bo kier e sosten di Parlamento, e ora Parlamento mester tuma un decision y mester tin e motivacion pa por haci esaki.
Y no hear/say di loke por a pasa den un ministerraad, cu no tin prueba di esaki, fuera di loke ta wordo bisa pa e Parlamentarionan.
Na e ministernan cu a referi cu a bisa, no a bin Parlamento, no a manda nada pa haci esaki. Ta hopi dificil na e momentonan aki pa por duna sosten na un mocion asina aki.
No sa si na final mas ta bay sali na cas despues di e disertacion di e minister.
Mas argumento
Lejuez a sigui splica cu si ta pidi Parlamento duna un mocion di desconfiansa, no partido, bo kier pa duna mayoria, e ora mester bin cu tur e argumentonan substancia. E ora a uza tur herment Parlamentario pa bo por a yega na e punto cu ta bisa cu a haci tur cos y no por haci nada mas. E ora no tin argumento pa bay en contra, segun Lejuez.
Como parlamentario Independiente, Lejuez, a splica cu e no tin ningun otro informacion cu locual e minister a trece den comision fiho. Durante e reunion fiho di parlamento, el a trece tur e puntonan di preocupacion den Serlimar. Es mas, e tabata hopi transparente. El a bin y splica kico ta pasando. Lejuez no a sinti ainda cu el a haci algo iresponsabel pa cu Parlamento. Eynan mester tene cuenta si cu ta Parlamento tin un decision pa tuma y no partido.
Division den Parlamento?
Lejuez ta compronde cu tin diferencia di opinion den e diferente fraccionnan. Pero esey mester keda resolvi y e solucion of e decision cu nan tuma, mester wordo presenta na Parlamento y splica pakico. Te ainda e no ta compronde otro cu locual ta sali den media, y no ta haya ta corecto cu como parlamentario, e mester sinta scucha cada relato y cada entrevista di cada minister siendo cu mester bin duna cuenta na Parlamento. Te ainda ningun a bin splica pakico nan a perde confiansa den Lopez-Tromp. Te ainda no tin motibo valido pa desconfia di dje. A menos cu awe e prueba sali diferente.
Segun Lejuez, prome cu e problema yega Parlamento, e mester bira un issue substancia. Bo no por trece un problema di partido Parlamento. Parlamento tey pa representa pueblo y no partido. E minister ta wordo presenta como minister di un partido, pero na final di dia, e ta wordo huramenta a titulo personal. Tur sa cu un di e ministernan di e coalicion, ora cu e mester a carga su responsabilidad ministerial, a titulo personal, no di su partido. Na fin di dia e responsabilisacion di e minister ta atitulo personal y no di e partido. Lejuez kier pa keda semper den cuadro di ley di cual tin cu opera y no bay riba e mocion so. Mester por fiha e feitennan pa tuma e decisionnan a base di contenido y no di e mocion.