Daño enorme rond di persecucion pa “Hit & Run”

Tur cos a cuminsa algo pasa di 7:00pm na altura di Wen Kee na Piedra Plat, ora cu a raporta un caso di “Hit & Run”. Un auto a pega tras di un auto di Pizza Hut, pero un di e autonan a busca forma pa huy mesora for di e sitio. A start un persecucion cu a drenta Santa Cruz, yega Rooi Frances y pasa den diferente cayanan di Sabana Basora. Mientrastanto a activa varios patruya di Polis pa tira bista riba e auto specifico aki.

Pa casualidad net na momento di e persecucion, e Helicopter di Polis tabata den aire y a mobilisa tambe y for di halto a señala e auto. Constantemente e helicopter a duna indicacion na e patruyanan di Polis unda nan mester core pa yega na e auto cu tabata purbando di scapa for di un accidente. 

Hopi accion Policial cu Hit and Run, Persecusion, Detencion y Accidente cu Polis

Hopi accion Policial cu Hit and Run, Persecusion, Detencion y Accidente cu Polis

Posted by 24ora on Wednesday, March 20, 2019

Pero memey di e persecucion, a saca un patruya for di San Nicolas cu a sali cu urgencia, cu zwaailicht y sirene pa bay yuda e coleganan den Pos Chikito. E ultimo aki a dal den un auto na altura di Cura Cabay. Despues di a dal den e auto a sigui bay dal den un palo di luz. Tabatin herido den e desgracia mientras cu e auto di Polis a keda tur destrui.

Mientrastanto e persecucion a sigui y Polis a logra “changa” e auto na altura di oficina di Serlimar na Pos Chikito (ex DTI). E chauffeur a bisa e Polisnan cu nan tin “suerte” cu e no ta cu e auto cu ta core duro, sino nan lo no por a gar’e.
E saldo di e persecucion aki ta: Un auto di Pizza Hut kibra, un auto di Polis totalmente kibra na Cura Cabay, un otro auto kibra den e mesun accidente ey y un palo di luz destrui. E chauffeur cu a comete “Hit & Run” y despues core pa Polis a keda deteni pa e por responde pa su accionnan.

Comments

comments