Danki Kustwacht Aruba: Piscador Edwin Dania di Boto Teresa ta gradici

2658

Edwin Dania ta doño di e boto Teresa. E boto aki ta mara na Pier di e Piscadornan di Rancho. Diadomingo diez di October Edwin Dania a sali cu un compañe Patrick Danje pa pisca na algun miya leu pazuid di Aruba.

Nan tabata cla pa bin tera despues di oranan di piscamento y caminda pa tera a haya problema cu motor. Nan a reacciona mesora pa yama Aruba Ports. Aruba Ports na su turno a avisa Kustwacht. Den menos cu 30 Minuut e personal di Kustwacht cu e Metal Shark a presenta den e lama bruto pa yuda boto Teresa. 

Aunke e no a bay facil riba lama durante e encuentro, tog nan a logra tow e boto trece tera. A bin cune na e pier di Rancho unda e ta mara. Eynan tampoco cos a bay facil pasobra e boto di Kustwacht a haya poco contra tiempo. Finalmente e cos mas importante ta cu tur hende a yega tera bon.

Den combersacion cu Piscador Edwin Dania, el a manda palabranan di Danki na Kustwacht pa e reacciona asina rapido y yudansa duna na e momento cu e problema a presenta.

Den nomber di e piscadornan di Rancho tambe un gradicimento special na e personal di Kustwacht cu e momento ey a logra yuda dos di nos miembronan.  Danki Kustwacht di curason pa tey riba yamada di nos piscadornan di Rancho.