Parlamentario Ricardo Croes no tabatin’e facil awe tardi dilanti edificio di Parlamento. Na dado momento el a bay purba papia cu e manifestantenan, pa purba convence nan pa no busca confrontacion cu Polis. El a haci un apelacion riba nan pa laga sano huicio prevalece y pa manifesta den forma pacifico. Pero, Richi Danies no a aprecia e conseho y a manda e Parlamentario bek paden.
El a bis’e na mas di un ocasion cu nan no ta haciendo nada malo y cu Polis no por deten’e. E motibo ta cu mester bin permiso di Ministerio Publico pa nan haci esey, locual lo no sosode pasobra ta Ministerio Publico mes a conseh’e pa organisa e manifestacion. Danies a insisti di lo sigui manifesta te ora Mariniernan bin move for di eynan. Esey ta e conseho cu el a haya for di ex-Procurador General.
Na dado momento, ora cu Parlamentario Ricardo Croes a bay purba papia cu e manifestantenan pa no busca problema cu Polis, mesora Richi Danies a cord’e cu ta “Rastaman” e ta y cu e mester para pa nan y no pa e Polisnan. Es mas, a bis’e pa e bay paden tambe pasobra e no a haci su trabou toch. Croes a bis’e cu e ta bay su cas y no paden y cu ningun hende no ta mand’e paden tampoco.
Por a sinti entre esunnan para dilanti Parlamentario Ricardo Croes, cu nan lo a spera hopi mas di dje den Parlamento. A spera cu e lo a pasa e ley di Cannabis locual te awe e no tin fin di cumpli cu ne. Pio ainda, su mesun partnernan den coalicion a vota tres biaha contra su mocionnan! Di otro banda, e asunto di abuso sexual di mucha tampoco no ta considera cu el a actua corecto ni apropia pa purba sali na defensa di e criaturanan.
