Dangui Oduber: Mester cuminsa cu e proceso pa yena e vacatura di director financiero di hospital

Un di e preocupacionnan grandi cu Minister Dangui Oduber tin ta, cu na final di 2018, Raad van Toezicht di Hospital a retira Theo de Kool cu tabata director financiero di hospital.

Na e momentonan ey Ezzard Cilie a keda como director medico. Raad van Bestuur di hospital ta consisti di un director general, un director medico y un director financiero. Na e momentonan aki ta un director medico a keda y esey, Minister Oduber a cuestiona e hunta di supervision ora cu a reuni cu n an.

A puntra nan tambe kico ta e motibo pakico ainda no a yena e vacatura di e director financiero mirando cu ta un posicion clave den hospital. Hospital ta un instituto hopi grandi y e maneho financiero ta clave den henter e organisacion. Ta lamentabel cu for di December, cu nan a retira de Kool.

Ora cu bo ta retira un hende, bo mester tin un plan B. Bo no ta retira un hende di awe pa mañan. Ta un serie di cos cu a bin ta pasa cu de Kool, manera cu a bin compronde di Hunta di direccion cu a conduci na su retiro.

Si na momento cu un serie di cos ta bin pasando, ya caba mester cuminsa prepara cu na momento cu tuma un decision di retira un persona, ya caba ta cuminsa e proceso pa busca un persona pa reemplas’e. Den e caso aki ta yega luna di Juni caba y ainda no tin un reemplasante. Esaki minister ta haya hopi negligente di parti di gerencia di Hospital y tambe di parti di e hunta di supervision, cu nan no a ni pone e vacatura pa cuminsa busca un persona. Loke nan a bisa ta, cu tin dos consultant ta yudando. Minister Oduber ta kere cu un organisacion asina grandi ta djis busca dos consultant pa reemplasa un director financiero. A splica nan cu nan tin cu cuminsa cu e proceso pa yena e vacatura, pero tambe ta importante pa busca un director general. Ta considerando tambe opcionnan cu tin como gobierno, pa busca un partner di afo, bin yuda den henter e proceso aki di mehoracion di e servicio cu ta duna na hospital.

Ta considerando diferente partner. Ta combersacionnan orientativo cu tin awor aki. No tin acuerdo cu ningun partner, pero ta considerando esaki si. Por ehempel na Imsan ta funciona optimalmente. Tin masha tiki keho riba e maneho operacional y servicio cu tin na Imsan. Imsan tin un bon partnership cu Baptist na Miami. Baptist tambe ta un di e partnernan cu por considera, pero esaki sigur ta na bienestar di comunidad.

Mester bin cambio, segun e mandatario y rapido. Ta spera cu e hunta di supervision tambe ta conciente pa nan asumi nan responsabilidad, si en caso e peticion mester wordo haci na bienestar di comunidad.

Minister Oduber no por acusa ningun hende, no por prueba esaki tampoco. Sin prueba no ta bay acusa ni e director, ni e directornan prome cun’e. Ta tende hopi cos riba caya cu hopi negoshi ta wordo haci no solamente na hospital, sino den AZV, den Salud Publico. Pero tanten cu no por prueba algo, ta dificil pa haci e acusacion eynan formalmente. Pa e mandatario, ta importante pa tin stabilidad. Pa tin hendenan capas, serio, cu e experiencia pa yuda hospital.

Hospital ta un instituto grandi cu mas di 1000 empleado. Ta un hospital tin na Aruba. Henter comunidad ta depende di e cuido medico cu ta brinda y ta su responsabilidad como minister di salubridad den e caso aki, pa percura cu tin trankilidad bao di e specialistanan, trankilidad bao di e trahadonan y pa tin personanan capas pa guia e hospital den e direccion corecto.

Kier baha e tempo di espera cu un persona ta warda momento cu e yega SEH. Hopi keho ta cu nan ta warda hopi largo. Kier baha esey. Kier reduci esaki. A haci un investigacion caba. A bin varios recomendacion cu hospital no a tuma na cuenta lamentablemente pa baha esaki.

Kier baha e wachttijd na momento cu ta bay un dokter di cas. Ta haya un verwijsbrief pa haya un specialista, y kier baha esey tambe. Ta un otro keho cu ta haya den comunidad cu na momento cu haya un verwijsbrief, tin cu warda varios luna. A cumins cu un proceso y dentro di un pa dos luna mas, porfin por logra e Arubig pa brinda nos studiantenan e posibilidad pa bay specialisa na Costa Rica, den cualkier pais den region pa bin traha bek na Aruba.