Dangui Oduber: Den cierto area lo evalua pa pone borchi pa hende no landa

Un punto importante cu oposicion a bin cu ne den e dianan cu a pasa referente na e planta di purificacion na Bubali (RWZI) ta e punto cu di cada mil persona cu bay landa den lama, 32 lo haya algun malesa. Esaki sigur ta alarmante suficiente.

Sinembargo Minister di Salud y Turismo, Dangui Oduber a comenta cu no ta na tur beach na Aruba esaki ta asina.

Departamento di Salud Publico ta tuma un rapport asina, manera esun di Carmabi hopi na serio. Ta busca tur loke ta necesario pa alivia, sino tambe purba alerta comunidad riba e caso aki. Gobierno lo atende cu esaki pa mira si tin necesidad pa pone borchi di advertencia na cierto area cu segun e rapport di Carmabi ta totalmente contamina, aunke esey nan no a duna indicacion cua ta mas contamina.

E minister ta indica cu e mandatarionan indica hunto cu DOW ta atendiendo e situacion aki y no ta for di awo ta haciendo esaki. Ya for di e prome gabinete ta haciendo varios inversion pa evita cu e situacion di contaminacion aki ta empeora.

Sinembargo esaki lo dura un tempo prome cu alivia esaki totalmente, pero si tin atencion completo como gabinete pa por soluciona esaki.

A base di esaki mes, e mandatario ta condena e expresionnan haci pa un miembro di fraccion di AVP. Ta haya un impresion cu si ta p’e, laga e turistanan haya sa cu Aruba ta contamina, laga e turistanan keda sin bin Aruba.

Pa un cobertura mas amplio lesa e edicion di TREMPAN di mañan.