E proyecto manera e hotel di Sero Colorado, ta discusionnan cu ta bin ta andando pa e ultimo 20 añanan caba. Gobierno di MEP a purba di busca un desaroyador pa e hotel aki. Gobierno di AVP tambe busca un desaroyador.
A papia e tempo ey di un cadena di hotel Bahia Principe. A papia pa bin cu e hotel na e luga specifico aki. Na momento cu tabata tin un cambio di gobierno, obviamente un cambio den minister di turismo, kende ta delinea sumaneho den ki direccion kier bay.
Kier bay den direccion di boutique hotels, productonan upscale, di un calidad hopi halto. A haci excepcion siguramente pa San Nicolas, mirando cu San Nicolas, pa decadanan ta purbando pa bin cu un desaroyo, no ta logra.
Den combersacion cu Minister di Infrastructura, for di aña pasa a informa caba cu e tereno aki, tin interes di un grupo di inversionista pa desaroya un proyecto di All Inclusive. Na e momentonan aki, e grupo no a firma un erfpacht overeenkomst ainda. Tin papia cu ta bay faseer e proyecto aki. No ta cuestion cu lo yega ehecuta un proyecto di 900 camber cu lo bay tin un impacto obviamente riba San Nicolas.
Segun Minister Oduber, Aruba mester un proyecto asina aki en particular den e area di San Nicolas mirando cu no tin un decision final kico lo bay pasa cu e refineria.
Gobierno di su parti ta invertiendo den upgrading di Baby Beach y Rodgers Beach. Ta invertiendo den e oficina di Turismo. SETAR ta invertiendo den nan oficina na San Nicolas. Meta Corp ta invertiendo pa habri un Cinema. Segun e minister, tur e desaroyonan aki, combina hunto cu e proyecto hotelero, ta e momento husto pa duna San Nicolas e chens pa bin cu un desaroyo asina. Ta algo necesario. Ta sostene e decision di gobierno pasobra no ta un decision di un minister, sino esaki a wordo discuti den conseho di minister.
Manera cu minister Oduber a bisa, ta den fase e lo yega na e 900 cambernan aki. No ta cuestion den un aña esaki lo ta ehecuta. Ta un proyecto cu ta tuma entre 1 pa 10 aña. Ta conciente di e preocupacion cu tin den e comunidad, pero na un manera responsabel, ta hiba un maneho cu e excepcion di San Nicolas. A introduci un moratorium pa pabao di brug, cu excepcion di e master plan, unda cu lo ehecuta proyectonan estilo Boutique Hotel y San Nicolas so ta keda cu e posibilidad pa bin cu un proyecto di mas camber cu ta hopi mas cu Boutique Hotel.
Grupo interesa
Na momento cu e erfpacht overeenkomst ta firma, e ora lo duna detaye di e grupo. Ta trata si di un grupo cu ta bin un All Inclusive. E grupo aki ta un combinacion di inversionistanan local y inversionistanan internacional y ta bin cu un cadena All Inclusive. Te asina leu, ta trata aki di un grupo cu ta bin cu un All Inclusive Resort cu ta di mas calidad cu nos tin caba na Aruba.
Beach
Tin un preocupacion den comunida, por ehempel esun band di Riu mes cu a duna y p’ariba nan ta papia di Baby Beach. St. Regis ta un erfpacht cu a wordo duna pa e gobierno anterior. Nan tambe tabata tin intencion pa lanta un hotel eynan. Loke ta di lamenta ta cu San Nicolas mester di inversion. Tur hende ta bisa cu San Nicolas a wordo lubida pa tur gobierno, cu no tabata tin intencionnan necesario. Awor aki gobierno ta haciendo su parti pa duna San Nicolas e inversion. E hotel aki sigur lo stimula economia y lo genera empleo.
